अख्तियारका आयुक्तको सेटिङमा एमयूका उपकुलपति र रजिस्ट्रारलाई सफाइ

काठमाडौं। अख्तियार दुरुपयोग अनुसन्धान आयोगको सुर्खेतस्थित कार्यालयमा असार २५ गते मध्यपश्चिमाञ्चल विश्वविद्यालय (एमयू) का पदाधिकारीविरुद्ध उजुरी पर्‍यो । पदाधिकारीले पद दुरुपयोग गर्दै व्यापक आर्थिक अनियमितता गरेको प्रमाणसहित सरोकारवालाले उजुरी दिँदासमेत अख्तियारले कागजात नियन्त्रणमा लिएन । उल्टै गोप्य उजुरीबारे अख्तियारका कर्मचारीले सूचना ‘लिक’ गराए । स्रोतका अनुसार उजुरी परेपछि बिल–भौचरलगायत लेखासँग सम्बन्धित कागजात विश्वविद्यालय प्रशासनले ‘रातारात मिलाउने’ मौका पायो ।

  कान्तिपुरमा खबर छ ।   असार २४ गते अख्तियारमै अर्को उजुरी पर्‍यो, न्यूनतम योग्यता पनि नपुगेकालाई इन्जिनियरिङ संकायमा सहायक डिन नियुक्त गरिएको विषयमा । इन्जिनियरिङ संकायका विद्यार्थीले दिएको उजुरीमा पदीय हैसियत दुरुपयोग गरी डिन नियुक्त गरेको भन्दै उपकुलपति प्रा.डा. उपेन्द्रकुमार कोइराला, रजिस्ट्रार महेन्द्रकुमार मल्ललाई कारबाही माग गरिएको थियो । उक्त उजुरीउपर पनि अख्तियार अनुसन्धान अघि बढाउन सकेको छैन ।

 गैरकानुनी रूपमा शिक्षक, कर्मचारी नियुक्त गरिएको उजुरीमा समेत अख्तियारले अनुसन्धान गरेन । शिक्षक र कर्मचारीसम्बन्धी असार २६ र भदौ ९ गते दर्ता भएका दुवै उजुरीउपर कुनै चासो नदिएको उजुरीकर्ताको गुनासो छ । ‘भाडामा सञ्चालित विश्वविद्यालयले चरम आर्थिक अनियमितता गरेको उजुरी दिँदासमेत फाइल नियन्त्रणमै लिन सकेन,’ उजुरीकर्तामध्येका अनिलबहादुर शाहीले भने, ‘अख्तियार किन मौन बस्यो ? हामी दंग छौं ।’ एमयूसँग आफ्नो इन्जिनियरिङ संकायअन्तर्गत स्नातकोत्तर तहको पाठ्यक्रम, कार्यक्रम नहुँदै निजी कलेजलाई सम्बन्धन दिन नहुने विश्वविद्यालय अनुदान आयोग (यूजीसी) को निर्देशनलाई अवज्ञा गर्दै सम्बन्धन दिन थालिएकामा रोक्न माग गर्दै अख्तियारमा अर्को उजुरी दर्ता भएको थियो ।

  तर, अख्तियार केन्द्रले आफूले अनुसन्धान गर्ने भन्दै फाइल झिकायो । ‘केन्द्रीय कार्यालयले हेर्छु भनेपछि हामीले नपठाउने कुरा भएन,’ एक कर्मचारीले भने, ‘सम्बन्धनलगायत मुद्दा माथिबाटै अनुसन्धान भइरहेको छ ।’अख्तियार स्रोतले उपकुलपति डा.उपेन्द्रकुमार कोइराला र आयुक्त नवीनकुमार घिमिरे नातेदार भएकाले माथि नै ‘सेटिङ मिलाएको हुन सक्ने’ बतायो । घिमिरे कोइरालाका साढुदाइ हुन् । दुवै एमाले कोटाबाट नियुक्त भएका हुन् । उपकुलपति कोइरालाले पटक–पटक उजुरीकर्ता लाई धम्क्याउने गरेको विद्यार्थीले बताए ।

 

Powered by Facebook Comments