कालिञ्चोकमा पनि केबुलकार

kalichok cablecar

  दोलखा । पवित्र धार्मिक स्थल दोलखाको कालीञ्चोक मन्दिरमा पनि केबुलकार सञ्चालनमा आएको छ । दोलखाको कुरी बजारदेखि कालीञ्चोक मन्दिरसम्म जाने केबुकारको सफल परिक्षण सफल भइसकेको छ । मुलुककै तेस्रो केबुलकारका रुपमा कालीञ्चोक दर्शन प्रालिले दुई वर्षअघि देखि निर्माण गरिरहेको केबुलकारको पहिलो चरणको परीक्षण सफल भएको कम्पनीका प्रमुख कार्यकारी अधिकृत अशोक शिवाकोटीले माइन्यूज नेपाललाई बताए ।

दोलखाली उद्योगीको लगानी रहेको केबुलकारमा चार वटा गोण्डला रहने र प्रत्येकमा १० जना बस्न सक्ने क्षमता रहेको कम्पनीले जनाएको छ । पहिलो चरणमा १५ देखि २० दिनसम्म परीक्षण गर्नुपर्ने भएकाले तीन दिनदेखि गोण्डला राखेर इञ्जिनियरिङ परीक्षण भइरहेको छ । धार्मिक पर्यटकीय क्षेत्र कुरी बजारदेखि कालीञ्चोक मन्दिरसम्म ९०० मिटर लामो दूरीको केबुलकार निर्माण गरिएको हो ।

‘दशैंलगत्तै स्विटजरल्याण्डबाट इलेक्ट्रिकल र प्रोग्रामर इञ्जिनियर आइपुग्ने र त्यसपछिको केही दिनको परीक्षणपश्चात् लगभग तिहार पछिबाट केबुलकार पूर्णरुपमा सञ्चालनमा आउने छ ।’ शिवाकोटीले भने ।

ashok shivakoti

४० करोड लगानीमा निर्माण सम्पन्न भएको केबुलकार शुरुमा २६ करोडमा निर्माण गर्ने भनिए तापनि निर्माण अवधि बढेको र सामानमा मूल्य वृद्धि हुनाका साथै नयाँ नियम नबनेको भन्दै सरकारले भन्सार छुट नगर्दा लागत बढेको निर्देशक शिवाकोटीले बताए । कालीञ्चोक मन्दिरसम्म केबुलकारको सुविधा पुगेपछि आत्तरिक र बाह्य पर्यटकहरुको घुँइंचो लाग्ने निश्चित छ । केबुलकार निर्माण भएसँगै पाँच मिनेटको पैदलमा कालीञ्चोक मन्दिरको दर्शन गर्न सकिन्छ ।

Comments

Top