कांग्रेसले अवरोध गर्दा गर्दै प्रदेश ७ को नाम र राजधानी दुई तिहाईले पारित

sansad 7

  काठमाडौं । प्रदेश ७ को नाम र राजधानी दुई तिहाई बहुमतले पारित गरेको छ । विपक्षी नेपाली कांग्रेस र राष्ट्रिय जनता पार्टी नेपालका १४ सांसदले बहिस्कार गरेपनि नाम र राजधानी दुई तिहाइले पारित गरेको हो । कांग्रेस र राजपाका सांसदहरुले मत हालेनन् भने बैठकसमेत वहिस्कार गरे ।

अब प्रदेश ७ को नाम सुदूरपश्चिम रहने भएको छ भने राजधानी गोदावरी नगरपालिका २ तेघरी हुने भएको छ । शुक्रबार बसेको प्रदेशसभा बैठकले उक्त प्रदेशको नाम सुदूरपश्चिम राख्ने र राजधानी गोदावरी नगरपालिका २ तेघरीमा राख्ने प्रस्ताव दुई तिहाई बहुमतले पारित गरेको हो ।

नेपाल कम्युनिस्ट पार्टीका सांसदहरुले सुदूरपश्चिमको पक्षमा मतदान गरेका छन् । प्रदेश ७ मा ५३ सांसद छन् । दुई तिहाईका लागि ३६ मत आवश्यक थियो। उक्त प्रस्तावको पक्षमा ३८ मत परेको थियो ।


नाम र राजधानी पाउने सुदूरपश्चिम तेस्रो प्रदेश हो । यसअघि कर्णाली र गण्डकी प्रदेशले आफ्नो नाम र राजधानी तोकिसकेका छन् ।

प्रदेशसभाले प्रदेशको नाम र राजधानी चयन गर्नका लागि नेकपाका सांसद तारा लामा तामाङको संयोजकत्वमा विशेष समिति गठन गरेको थियो । उक्त समितिले केही दिनअघिमात्र प्रतिवेदन दिएको थियो । समितिको प्रतिवेदन अनुसार नै प्रदेशको नाम र राजधानी पारित भएको हो ।

Comments

Top