महिला तथा किशोरीहरूमा हूने हिंसा र चेलिबेटी बेचबिखनबिरुद्ध माइती नेपाल र एनआरएनए जापानले सहकार्य गर्ने

nrn_japan
टोकियो ।
गैरआवासीय नेपाली संघ जापानले महिला तथा किशोरीहरूमा हूने हिंसा र चेलिबेटी बेचबिखन बिरुद्ध माइती नेपालसंग सहकार्य गर्ने भएको छ ।
गैरआवासीय नेपाली संघ एनआरएनए जापानले महिला तथा किशोरीहरूमा हूने हिंसा विरूद्ध नयाँ अभियान शुरू गरेसँगै त्यस्ता हिंसाको जोखिम न्युनिकरणका लागि काम गर्ने भएको हो । परम्परागत मूल्य मान्यताका आधारमा गरिने हिंसाका कारण महिलाहरू बढी पीडित बन्ने गरेका छन् । आर्थिक, सामाजिक, राजनीतिक, नागरिक तथा साँस्कृतिक लगायत मानवअधिकारका आधारभूत अधिकारहरूबाट महिलाहरू वन्चित रहदै आएका कारण पनि दिनानुदिन महिला हिंसा,चेलिबेटी बेचबिखन, जवर्जस्ती करणी तथा हत्या जस्ता जघन्य अपराध बढिरहेको र पिडित पक्षले न्याय पाउन नसकेको अवस्थाको बोध गर्दै पिडितको न्यायको पक्षमा लड्नको लागि अभियान शुरू गरिएको एनआरएनए जापानले जनाएको छ ।  

सहकार्य हस्ताक्षर कार्यक्रममा माईती नेपालकी अध्यक्ष एनआरएनए जापानको नयाँ अभियानले हिंसा प्रभावितहरूले उपचार तथा कानूनी कार्यमा दरिलो साथ पाउने बताईन् । आधुनिक विज्ञानको विकाशसँगै नयाँ पुस्तामा आएको सचेनताका कारण नेपालमा महिला तथा किशोरीहरुमा हुने गरेका यौनहिंसा जवर्जस्ती करणी र हत्या जस्ता जघन्य अपराधका बिरूद्ध कानूनी उपचारसंगै आर्थिक तथा भौतिक र नैतिक सहयोग जुटाउने उद्देश्यले शुरू भएको एनआरएनए जापानको उक्त अभियानमा अक्षयकोष लगायतको व्यवस्थापकीय जिम्मेवारी माइती नेपालले गर्ने भएको छ ।

एनआरएनए जापानका अध्यक्ष टासी वाङदी लामाले नेपालमा हुने गरेका महिला तथा बालबालिकाहरू माथी हुने महिला हिंसा, जवर्जस्ती करणी, हत्या जस्ता कूकार्यको विरूद्ध कुनै पनि अवस्थामा आर्थिक ,सामाजिक तथा नैतिक साथ र सहयोग गर्न विश्वभरि रहेका नेपालीहरू एकजुट भएर साथ दिनु पर्ने बताए । उनले सामाजिक संजालमा रेस्पेक्ट एण्ड राईज मोवाइल एप्स मार्फत विश्वको सब नेपालीले यस अभियानलाई सहयोग गर्न सकिने बताए ।
उक्त अभियानका लागि एनआरएनए जापानले तत्काल पाँच लाख रूपैयाँको अक्षयकोष स्थापनाबाट शुरू गरेको छ ।

Comments

Top