उजुरीका चाङका कारण चोलेन्द्रशमशेरको सुनवाई रोकियो

cholendra_1

   काठमाडौं । संसदीय सुनुवाई विशेष समिति बैठकमा समय अपुग भएको भन्दै प्रधानन्यायाधीशमा सिफारिश भएका चोलेन्द्र शमशेर जबराले आज जवाफ दिन पाएनन् । आइतबार अपरान्ह सिंहदरबारस्थित संसदीय सुनुवाइ समितिमा आज सुनुवाई हुने बताइएको थियो । चोलेन्द्र शमशेरविरुद्ध उजुरीका चाङहरु थुप्रिएपछि उनको प्रधानन्यायाधीश बन्ने सम्भावना पनि क्षण हुँदै गएको छ ।

दिउँसो २ बजे सुरू भएको सुनवाइको सुरुमा जबराले १५ बुँदे आफ्नो कार्ययोजना पेश गरे । तर, संसदहरुले सोधेको प्रश्नको जवाफ भने दिन पाएनन् ।

चार बजेसम्म पनि संसदहरुले प्रश्न राख्ने प्रक्रिया जारी रहँदा जबराले जवाफ दिन नपाएका हुन् । सांसदहरुले सुनुवाई प्रक्रिया जारी राख्न चाहेपनि सभापति लक्ष्मणलाल कर्णले कर्मचारीहरुको आन्दोलनका कारण देखाउँदै यो सम्भव नभएको भन्दै बाँकी छलफल भोलि ११ बजेलाई तोके । तर, भोली पनि नेपाली कांग्रेसका नेताहरुले नभ्याउने भनेपछि बैठक मंगलबारका लागि सारिएको छ ।

कांग्रेस सांसद ज्ञानेन्द्रबहादुर कार्कीले भोलि मेलमिलाप दिवसको कार्यक्रममा व्यस्त हुने भएकाले आफूहरु उपस्थित हुन नसक्ने बताएपछि पर्सि (मंगलबार) ११ बजेलाई बैठक राखिएको छ । जबराले पर्सि नै जवाफ दिनेछन् ।

१० देखि ४ बजेसम्म भन्दा बढी काम गर्दा अतिरिक्त पारिश्रमिक पाउनु पर्ने माग राख्दै आन्दोलित कर्मचारीले जबराको सुनुवाइमा पनि निरन्तरता दिंदा आजको बैठक ४ बजे नै स्थगित गरिएको हो । कर्मचारीको आन्दोलनले यसअघि संसद र समितिका बैठकहरू पनि प्रभावित हुँदै आएका थिए।

Comments

Top