गणेशमान र भट्टराईको इतिहासमा कांग्रेसले नै कालो धब्बा लगाएः सांसद बस्नेत

 

भक्तपुर । जिल्लाको सूर्यविनायक नगरपालिका वडा नं. ८ स्थित चुख्खु खोलामा ट्रस पुलको शिलान्यास गरिएको छ । नेपाल कम्युनिष्ट पार्टी (नेकपा) केन्द्रीय सदस्य, पूर्वमन्त्री तथा प्रतिनिधिसभाका सांसद महेश बस्नेतले मंगलवार उक्त पुलको शिलान्यास गरेका हुन् ।

संघीय सरकारको स्थानीय स्तरका सडक पुल कार्यक्रम अन्तर्गत विनियोजित रु २० लाख ५१ हजार २ सय ६० को लागतमा सिपाडोलको टार जाने चख्खु खोलामा ट्रस पुल निर्माणको लागि शिलान्यास सम्पन्न भएको छ । उक्त खोलामा एक वटा ठूलो मोटरेवल पुल निर्माण सम्पन्न भइसकेको छ भने एक वटा ठूलो मोटरेवल पुलहरु निर्माण सम्पन्नको चरणमा पुगेको छ । जसमा मंगलवार चख्खु खोलामा तेस्रो पुलको शिलान्यास गरिएको हो । भक्तपुरका विभिन्न ठाउँहरुमा यो वर्ष साना तथा ठूला गरी जम्मा १६ पुलहरु निर्माणको क्रममा रहेको छन् ।

अबको तीन वर्षभित्रमा भक्तपुरमा जनतालाई आवश्यक पर्ने सम्पूर्ण पुलहरु निर्माण गरिसक्ने साथै निर्माणका क्रममा रहेका सडकहरुलाई स्तरउन्नती तथा कालोपत्रे गरी जनताको विकासप्रतिको सपनालाई पुरा गर्ने गरी जनप्रतिनिधिको साथमा स्थानीयवासीले उल्लासमय रुपमा साथ, समर्थन र सहयोगका साथ सडक, ढल, खानेपानी, शिक्षा, स्वास्थ्य, वातावरण स्वच्छतालगायतका सम्पूर्ण विकासका ढोकाहरु खुल्ला भएका छन् ।

 

सडकको विकास, विस्तार तथा स्तरउन्नतीले गर्दा स्थानीयवासीमा अप्रत्यासित खुसी छाएको उल्लेख गर्दै सांसद बस्नेतले आफुले निर्वाचनको समयमा जनताको माझमा गरेको प्रतिवद्धता अनुरुप पुल, सडक, खानेपानी, ढल, करिडोरलागयतका असंख्य कामहरु अगाडी बढाई प्रभावकारी ढंगले विकास भएको जनताले अनुभुति गरिरहेका छन् ।

कार्यक्रममा बोल्दै सांसद बस्नेतले कुटुञ्जेमा खेर गएको जमिनमा मानव अंग प्रत्यारोपण अस्पताल बनाउने प्रकृया अघि बढाएको तर केही स्वार्थ बोकेका व्यक्तिहरुले गणेशमानको शालिक भनि रोकेर राखेकोप्रति आक्रोस व्यक्त गर्दै गणेशमान सिंह र कृष्णप्रसाद भट्टराईलाई कांग्रेसले अपमान गरेको आरोप लगाए । पछिल्लो समय गणेशमानको नाममा कांग्रेसका नेता तथा कार्यकर्ताहरुले कमाई खाने भाँडोको रुपमा प्रयोग गरको उल्लेख गर्दै कांग्रेसका स्वार्थी, कालोबजारी, दलालीलयातले गणेशमान र भट्टराईको इतिहासमा नै कालो धब्बा लगाएको बताए ।

उनले भने, ‘गणेशमान कांग्रेसको नीति नेता हैन, सवैको नेता हो । गणेशमानले मर्ने बेलामा रुख हेरेर हैन, मुख तथा व्यवहार हेरेर भोट हाल भन्नुभएकोले कांग्रेसको गतिविधिले गणेशमान र कृष्णप्रसाद भट्टराई कांग्रेसको हो भन्न समेत नमिल्ने अवस्थामा पुर्याए ।’

उक्त स्थानमा अस्पताल बन्ने उल्लेख गर्दै सांसद बस्नेतले दुई अर्व आएको बजेटबाट अस्पताल बनाउन दिने सड्यन्त्र भइरहेको तर त्यसलाई जनताले स्वीकार्न नसक्ने स्पष्ट पारे । गणेशमानको शालिक तथा बाटिकालाई वर्तमान जनप्रतिनिधिको नेतृत्वमा बजेट व्यवस्थापन गरेको बताउँदै भक्तपुरको विकास देखेर कतिपयलाई ज्वरो आउन थालेको समेत बताए ।

जताततै विकास लहर आएको बताउँदै सांसद बस्नेतले आदर्श बसपार्कबाट घ्याम्पेडाँडा जाने १२ मिटरको सडक, चख्खुखोलाबाट भट्टराईटोल बस्नेतगाउँ जाने १२ मिटरको सडक, घ्याम्पेडाँडा–नैचाल सडक, पलाँसे डोलेश्वर सडक, सूर्यविनायक गणेशथान हुँदै कृष्ण मन्दिर जाने सडकलगायतका दर्जनौं सडकहरु तिव्र गतिमा निर्माण भइरहेको जानकारी गराए । भक्तपुरका सडकहरुमा पर्खाल निर्माणको कार्यहरु भईरहेको र अबका दिनमा ग्राभेल तथा कालोपत्रे गर्ने प्रतिवद्धता जनाउँदै बस्नेतले वर्तमान अवस्थामा भक्तपुरका कुनै पनि विद्यालय भवनहरु कच्ची नभएको र यो वर्ष आवश्यक व्यवस्थापन गरी व्यवस्थित भवनहरु निर्माण गरिसक्ने बताए ।

 

जगातीको ईटा टायल कारखानामा एकिकृत सरकारी कार्यालय तथा आधुनिक तरकारी बजारको व्यवस्थापन गर्ने प्रकृया अघि बढेको उल्लेख गर्दै उनले गुण्डुमा जगातीको यातायात कार्यालय रहेन गरी आवश्यक संरचना समेत निर्माणको रहेको जानकारी गराए।

उक्त स्थानमा रंगशाला बनाउने कुरा कुनै हालतमा नरोकिने बताउँदै उनले सिपाडोलमा अन्तर्राष्ट्रिय स्तरको रंगशाला निर्माण गर्ने भनि योजना अघि बढेको तर नेपाल मजदुर किसान पार्टी (नेमकिपा)का केही नेता तथा कार्यकर्ताहरुले मन्त्री आएपनि कालो झण्डा देखाउने, मन्त्रालयमा डेलिकेशन जाने गरेका गुनासो व्यक्त गरे ।

उनले भने, ‘प्रत्येक वडामा एउटा महत्वपूर्ण योजना निर्माण हुने प्रकृया अघि बढेसँगै विकास र समृद्धिको जनताको सपना पुरा हुने मात्र नभई असंख्य रोजगारीको वातावरण समेत सिर्जना हुनेछन् । सामाजिक सञ्जालको कमेन्ट तथा केही व्यक्तिको विरोधले विकास रोकिन्न । सके सहयोग गरौं, नसके विरोध नगरौं ।’

राम्रो कामको लागि कसैले अनसन बस्नु नपर्ने उल्लेख गर्दै उनले चिया पसलमा बसेर हावा गफ गर्दै जनतालाई भ्रमित पार्ने कार्य नगर्न आग्रह समेत गर्नुभयो । भक्तपुरमा जनताको ९५ प्रतिशतभन्दा बढी समस्या समाधान तथा मागलाई सम्बोधन गरेको समेत उहाँले तथ्यपरक रुपले प्रस्तुत गरे ।

वर्तमान सरकारका कारण भ्रष्टाचारीलाई सरकारले कारवाही गरेका कारण देश छोडेर भाग्ने स्थिती बनेको उल्लेख गर्दै उनले बलात्कार बढेको नभई जनतामा चेतनाको विकास र सरकारप्रतिको विश्वासले जनताले पिडा वाहिर ल्याउन थालेको साथै प्रहरीमा उजुरी दिन थालेको जिकिर गरे ।

Comments

Top