मेलम्चीको घाउमा काठमाडौं महानगरको मल्हम

Kathmandu

काठमाडौं । काठमाडौं महानगरबासीको तीर्खाको प्यास मेटाएको सिन्धुपाल्चोकको मेलम्चीका लागि काठमाडौं महानगरले सहयोग गर्ने भएको छ ।

अविरलको वर्षापछि आएको पहिरोसँगैको बाढीका कारण मेलम्ची खोला र इन्द्रावती खोला आसपासका घरवस्तीका साथै बजार तहसनहस भएपछि काठमाडौं महानगरले २ करोड रुपैयाँ दिने घोषणा गरेको हो ।

बिहीबार आगामी आर्थिक वर्षको नीति तथा कार्यक्रम सार्वजनिक गर्दै मेलम्ची र हेलम्बुका बाढी प्रभावित क्षेत्रमा सहयोगस्वरुप २ करोड रुपैयाँ दिने घोषणा महानगरका मेयर विद्यासुन्दर शाक्यले गरेका हुन् ।

महानगरले दिएको रकम बाढी प्रभावितको राहत तथा उद्धारका लागि दिइने मेयर शाक्यले बताएका छन् । हेलम्बु र मेलम्चीले काठमाडौंलाई पानी दिएको कारण पनि महानगरले सहयोग गरेको उनले बताएका छन् ।

मंगलबार राति पहिरोले थुनिएको मेलम्ची खोलामा बाढी आउँदा हेलम्बु र मेलम्चीका धेरै घर डुवानमा परेको छ र सयौं मानिस घरबारविहीन भएका छन् । बाढीले सडक, पुललगायतका सार्वजनिक संरचनामा पनि क्षति पुर्‍याएको छ । बाढीमा परि दर्जनौं मानिस सम्पर्क बिहीन भएको पनि जनाइएको छ ।

Comments

Top