३३ किलो सुन काण्डमा निरौला पक्राउपछि पुर्व अाईजीपी प्रकाश अर्याल पनि तानिंदै

niraula

काठमाडौं। दुबईबाट अवैधरूपमा भित्रिएको ३३ किलो सुनको भरियाका रूपमा रहेका सनम शाक्यको हत्यापछि प्रहरीले उक्त काण्डमा संलग्न रहेको अभियोगमा पुर्व डीआईजी गोविन्द निरौलालाई पक्राउ गरेको छ।

उक्त सुन काण्डको अनुसन्धान गरिरहेका गृह मन्त्रालयका सहसचिव ईश्वर पौडेलको टोलीले पुर्व र्वडीआईजी निरौलालाई नियन्त्रणमा लिन प्रहरीलाई निर्देशन दिएपछि उनी पक्राउ परेका हुन्।

अनुसन्धान टोलीले छानविनका क्रममा त्रिभुवन अन्तर्राष्ट्रिय विमानस्थलमा कार्यरत पुर्व डीआईजी निरौला सुन तस्करबीच पटकपटक सम्पर्कमा रहेको र विमानस्थलबाट सुन पास गराउन भूमिका खेलेको निष्कर्ष निकालेको थियो।

गत माघको अन्तिम साता नेपाल भित्रिएको उक्त सुनका मालिक हुन् चुडामणि उप्रेती। उप्रेतीले नेपालका सबै सुरक्षा निकायलाई सेटिङ गरेपछि उक्त सुन नेपाल भित्रिएको थियो। उक्त सुनको भरियाका रूपमा रहेका शाक्यलाई सुन गायब बनाएको अभियोगमा उप्रेतीका मान्छेले चरम यातना दिएर हत्या गरेका थिए।
उनको हत्यापछि प्रहरीले छानविन गर्ने क्रममा पुर्व प्रहरी महानिरीक्षक प्रकाश अर्यालको समेत संलग्नता रहेको आशंका गरेको छ। छानविन समितिले उक्त सुन काण्डमा संलग्न रहेका भनिएका पुर्व आईजीपीका बारेमा समेत अनुसन्धान शुरू गरेको छ।

प्रहरीले उक्त काण्डमा संलग्न रहेको अभियोगमा महानगरीय अपराध महाशाखाका तत्कालीन प्रमुख एसएसपी दिवेश लोहनी, डीएसपी प्रजित केसी र सई बालकृष्ण सन्जेललाई प्रधान कार्यालय तानेर छानविन शुरू गरेको छ।

उक्त काण्डमा संलग्न रहेको अभियोगमा प्रहरीले आरके ज्वलर्सका सञ्चालक राजेन्द्र शाक्यलगायतलाई पक्राउ गरी कारबाही अगाडि बढाएको छ। प्रहरीले उक्त सुन प्रकरणमा अहिलेसम्म ४० जनालाई पक्राउ गरेको छ। उक्त सुन काण्डमा संलग्न रहेको आशंकामा प्रहरीले ३८ जनाको सम्पत्ति रोक्का गरेको छ भने २२ जनालाई फरारको सुचिमा राखेर खोजी गरिरहेको छ।(समाचार पत्र )

 

Comments

Top