ससुराका उम्मेदवारलाई ज्वाँइले हराए

dipak mudhvari

 काठमाडौं । नेपाली कांग्रेस निकटको संस्था नेपाल स्वास्थ्यकर्मी संघको निर्वाचनबाट रोचक नतिजा देखा परेको छ । भ्रष्टाचार आरोपमा मुद्दा खेपेर पनि अध्यक्षमा रामजी घिमिरेले तेस्रोपटक विजयी भएर ह्याट्रिक हानेका छन् ।

 घिमिरे ओमप्रसाद उपाध्याय भन्दा ११४ मत बढी ल्याएर विजयी भए । घिमिरे कांग्रेस सभापति शेरबहादुर देउवानिकट मानिन्छन् । त्यसैगरी महासचिवमा दीपकराज भट्टले प्रतिद्वन्द्वी शंकर कडेँललाई पराजित गरी विजयी भए । स्वतन्त्र उम्मेदवार रहेका भट्टलाई पूर्वबहादुर खड्का र दिलेन्द्र बढुले समर्थन गरेका थिए ।

 यता, बरिष्ठ उपाध्यक्षमा भने ज्वाँइ–ससुराकै लडाई देखियो । युवा नेता गगन थापाले वरिष्ठ उपाध्यक्षमा रामचन्द्र साहलाई उम्मेदवार बनाएका थिए भने थापाकै ससुरा नेता अर्जुन नरसिंह केसीले दिपक मुडभरीलाई समर्थन गरेका थिए । रामचन्द्र साह २६२ मत पाएर विजयी भए भने उनका प्रतिद्वन्द्व दिपक मुडभरी र भवानी शर्माले क्रमशः १६७ र ९९ मत प्राप्त गरे ।

 गगन थापा स्वास्थ्य मन्त्री हुँदा साहलाई स्वास्थ्य व्यवसायी परिषद्को रजिष्ट्रारमा नियुक्ति गरेका थिए । उनै साहलाई जिताउन थापाले मुडभरी खेमाकै भवानी शर्मालाई चुनावमा लडाएका थिए ।

 थापा मैदानमा नदेखिएपनि सहयोगीद्धय प्रताप पौडेल र कृष्ण रिजाललाई प्रयोग गरी साहलाई जिताउनका लागि थापाले शर्मालाई विद्रोही उम्मेदवार बनाएका थिए ।

 मुडभरीलाई आफ्नै ससुरा अर्जुन नरसिंह केसीको समर्थन रहेको थाहा पाउँदा समेत थापाले ससुराविरुद्ध नै भूमिका खेलेर अन्तर्घातको काम गरेको कांग्रेस नेताहरुले आरोप लगाएका छन् ।

 यसबारेमा मुढभरीसँग प्रतिक्रिया लिन खोज्दा ‘निर्वाचनमा घात अन्तर्घात भएको पक्कै हो तर, कसले के गरे भन्ने विषयमा म बोल्न चाहन्न भन्दै पन्छिए ।

 यता, खुल्ला उपाध्यक्षमा देवाराज लामिछाने निर्विरोध निर्वाचित भए । कोषाध्यक्षमा सुरेश पासवान विजयी भए । त्यसैगरी संघको महिला उपाध्यक्षमा रमिला चौलागाईँ, सरकारीतर्फ उपाध्यक्षमा किरण ओली, निजी तर्फ उपाध्यक्षमा साहिला गिरी निर्वाचित भए ।(यूनाइटेड पोस्ट साप्ताहिक )

Comments

Top