राससका श्रमजीवि पत्रकारद्वारा दोश्रो चरणको आन्दोलन घोषणा

 

काठमाडौं । व्यवस्थापनले श्रमजीवि पत्रकारको हकअधिकारको स्थायित्व गर्नुको साटो उल्टै रोजिरोटीबाटै विमुख हुने अबस्था सिर्जना गराएको भन्दै राष्ट्रिय समाचार समिति (रासस)मा कार्यरत श्रमजीवि पत्रकार आन्दोलित भएका छन् । गएको साउनदेखि नै विभिन्नमाग राखेर पटकपटक मौखिक र लिखित रुपमा ध्यानाकर्षण गराउँदा पनि राससका अस्थायी–करार ज्यालादारीमा कार्यरत श्रमजीवि पत्रकारका माग पुरा गराउन व्यवस्थापनले अटेरी गरी पेशा नै गुमाउनुपर्ने अबस्था सिर्जना गरेकाले बाध्य भएर आन्दोलित हुनु परेको पिडित पत्रकारले बताएका छन् ।

पहिलो चरणमा माग पुरा गराउन साङ्केतिक रुपमा आन्दोलनका कार्यक्रम सार्वजनिक गरी ध्यानाकर्षण गराउँदा सुनुवाई नभएपछि आज बसेको श्रमजीवि पत्रकारको संयुक्त संघर्ष समितिको बैठकले विहिबारदेखि दोस्रो चरणको आन्दोलन गर्ने घोषणा गरेको संयोजक रमेश गिरीले जानकारी दिए । यसअघि फागुन ६ गते पहिलो चरणको आन्दोलन घोषणा गर्दै उनीहरुले फागुन ७ गते राससको हिरक महोत्सवमा सहभागिता नजनाउने निर्णय गरी साङ्केतिक विरोध गर्दै माग पुरा गराउन पाँचदिनको समयसिमा दिएका थिए । तर त्यसमा व्यवस्थापनले कुनै सुनुवाई नगरेपछि बाध्य भएर आन्दोलनका कार्यक्रम सार्वजनिक गर्नु परेको संयोजक गिरीले बताए ।

सञ्चार मन्त्रालयले राससमा कार्यरत श्रमजीवि पत्रकारका माग सम्बोधन गर्न रासस व्यवस्थापन पक्षलाई पटकपटक निर्देशन दिए पनि व्यवस्थापन पक्षले त्यसलाई लत्याउँदै आएको छ । सञ्चार तथा सूचना प्रविधिमन्त्री पार्वत गुरुङले श्रमजीवि पत्रकारको माग सम्बोधन गरेर मात्रै अन्यप्रक्रिया अघि बढाउन निर्देशन दिए पनि व्यवस्थापन पक्षले अटेरी गरेर पदपूर्ति प्रक्रिया अघि बढाएकोमा पत्रकारले आपत्ती जनाएका छन् । मन्त्री गुरुङले पत्रकारसँग भएको छलफलमा समेत स्थायित्वको सुनिश्चितता गरिने आश्वासन दिएका थिए । राससको हिरक महोत्सवका क्रममा उनले तत्काल समस्या समाधान गर्न व्यवस्थापनलाई निर्देशन समेत दिएका थिए ।

समितिका संयोजक गिरीका अनुसार दोस्रो चरणको आन्दोलन अन्तरगत रासस केन्द्रीय कार्यालयमा फागुन १३ र १४ गते कालोपट्टी बाँधेर काम गर्ने, फागुन १५ र १६ गते कालो मास्कलगाएर प्रदर्शन गर्ने र फागुन १७गते रासस केन्द्रीय कार्यालयमा धर्ना दिनेलगायतका कार्यक्रम सार्वजनिक गरेका छन् । उनीहरुले आन्दोलनको जानकारी नेपाल पत्रकार महासंघ, प्रेस संगठन नेपाल, प्रेस युनियन नेपाललगायत सञ्चारसँग सम्बन्धित संघसंगठनलाई समेत दिइसकेका छन् ।

दोस्रो चरणको आन्दोलनपछि पनि रासस व्यवस्थापन पक्षले मागको सुनुवाई नगरे रासस प्रशासन शाखा, महाप्रबन्धक र अध्यक्षको कार्यकक्षमा तालाबन्दीलगायत कडा आन्दोलनका कार्यक्रम गर्ने चेतावनी दिएका छन् । संविधानको मौलिकहकमा रोजगारीको हकको सुनिश्चितता गरिएको र श्रमजिवी पत्रकार ऐनले पत्रकारको रोजगारीको ज्ञारेन्टी गरे पनि रासस व्यवस्थापनले संविधान र कानुनको बर्खिलाप हुने गरी पदपूर्ति प्रक्रिया अघि बढाएको पिडित पत्रकारले बताएका छन् ।

श्रमजीवि पत्रकार ऐन २०५१ (संशोधन २०६४)ले पनि ति पत्रकारको रोजगारीको सुनिश्चिता गरेको सन्दर्भमा त्यसलाई वेवास्तागर्दै व्यवस्थापन पक्षले श्रमजीविपत्रकार विरुद्ध हुनेगरी कार्य प्रक्रिया अघि बढाएको जनाइएको छ । आज दोस्रो चरणको आन्दोलनको ज्ञापनपत्र बुझ्दै राससका महाप्रबन्धक ओपेन्द्र शर्माले पत्रकारको मागका विषयमा आफु गम्भिर रहेको र समस्या समाधानमा पहल भइरहेको जानकारी दिए । राससको नेपाल राष्ट्रिय कर्मचारी सङ्गठनका अध्यक्ष प्रेमप्रसाद उपाध्यायले पत्रकारहरुले उठाएका माग जायज रहेकोले तत्काल सम्बोधन गर्न व्यवस्थापन पक्षसँग माग गरे । उनले माग सम्बोधनका लागि पहल गर्ने आश्वासन समेत दिए ।

पत्रकारको मागका विषयमा रासस भित्र रहेका कर्मचारी संघ संगठनले ऐक्यवद्धता जनाइसकेका छन् । पत्रकारहरुले रोजगारीको स्थायित्व हुनुपर्ने, विनियमावली संसोधन गरेर कर्मचारी परिभाषाभित्र समेट्नुपर्ने, कार्यरत पत्रकारलाई खुला प्रतिष्पर्धामा सहभागि हुने अधिकारको सुनिश्चितता हुनुपर्ने, विगतमा राससमा गरिएको अभ्यासअनुसार समान तह खुला आन्तरिक प्रतिष्पर्धाद्वारा स्थायीप्रक्रिया अघि बढाउनुपर्ने लगायतका माग राख्दै आएका छन् । स्मरणरहोस् यसअघि विसं २०७२ मा यहाँ कार्यरत ३२ जना पत्रकारलाई सोही प्रक्रियाद्वारा स्थायी गरिएको थियो ।