चुनाव कसैले रोक्न सक्दैन, आचारसंहिता यसै सातादेखि लागू

काठमाडौं : प्रमुख निर्वाचन आयुक्त डा. अयोधीप्रसाद यादवले वैशाख ३१ गते हुने चुनाब कसैले रोक्न नसक्ने बताएका छन् । उनले अब एक हप्ताभित्रै निर्वाचनसम्बन्धी आचारसंहिता लागु हुने र सरुवा–बढुवा एवं नियुक्तिहरु गर्न नपाइने स्पष्ट पारेका छन्। राजधानीमा आज आयोजित एक कार्यक्रममा बोल्दै प्रमुख आयुक्त यादवले आयोगले यही हप्ताभित्रै आचारसंहिता लागु गर्ने बताए । उनले भने–‘शुन्य सहनशीलताका आधारमा हामी आचारसंहिता लागू गर्ने गरी विशेष छलफलमा छौं, आचारसंहिता लागु हुनेवित्तिकै सरुवा, बढुवा र नियुक्ति केही हुन दिँदैनौं ।’ आयोगले निश्पक्ष, स्वतन्त्र एवं स्वच्छ निर्वाचन गर्न सम्पूर्ण शक्ति लगाउने बताउँदै उनले भने–‘हामी स्वतन्त्र र निश्पक्ष रुपमा निर्वाचन गर्छौं ।’ निर्वाचन हुँदैन कि भनेर अब कसैले पनि शंका गर्न नहुने यादवले बताए । ‘यादवले चुनावलाई चुनौतिभन्दा पनि अवसरका रुपमा लिएको उल्लेख गर्दै निर्वाचन हुने ठोकुवा गरे । चुनावका लागि सरकारले खुट्टा नकमाउनेमा आफू पूर्ण विश्वस्त रहेको यादवले बताए । सरकारले खुट्टा कमाए आमसञ्चार साक्षी रहेको उनले बताए । स्थानीय निर्वाचन देश र जनताका लागि अति आवश्यक रहेको बताउँदै यादवले भने–‘निर्वाचन हाम्रो जीवनसँग जोडिएको छ, हाम्रो अधिकार खोसिएको अवस्थामा थियो, अहिले जनताको अधिकार प्राप्त भएको छ, अब चुनावले त्यो अधिकार सुनिश्चितता गर्छ ।’