गुण्डा नाइके दावा लामालाई ५ दिन थुनामा राख्न आदेश,गिरीमाथि फेरी आक्रमणको खतरा

काठमाडौं । काभ्रेली कुख्यात गुन्डा नाइके दावा लामा भनिने जितेन्द्र तामाङलाई जिल्ला अदालत काठमाडौंले ज्यान मार्ने उद्योगमा ५ दिन हिरासतमा राखेर अनुसन्धान गर्न प्रहरीलाई आदेश दिएको छ । महानगरीय प्रहरी परिसर, टेकु, काठमाडौंले दावा र प्रवीण खड्कालाई  व्यवसायी राम गिरीलाई दरबारमार्गमा शुक्रबार राति ज्यानमार्ने उद्देश्यले सामूहिक रुपमा सांघातिक आक्रमण गरेको भन्दै अदालतमा हाजिर गराएको थियो । घटनास्थलबाट  गुन्डा नाइके दावा र सहयोगी प्रवीणलाई शुक्रबार राति नै प्रहरीले पक्राउ गरेको थियो । गिरीद्वारा दरवारमार्गमा संचालित क्लब डेजा भियुमा आधा दर्जन गुण्डाहरु बोकेर शुक्रबार राती लामाले आक्रमण गर्दा गिरीको टाउकोमा गम्भिर चोट लागेको थियो । शुक्रबारबाट संचालनमा आएको उक्त क्लबमा दाबाले जबर्जस्ती शेयर मागेर गिरीलाई धम्काउँदै आएको समेत खुलेको छ । गिरीले आफु राम्रो काम गरेर खाने मान्छे भएको तर गुण्डागर्दी गर्नेलाई जबर्जस्ती नि:शुल्क शेयर दिन नसकिने बताएपछि लालाले गुण्डाहरु परिचालन गरी गिरीबिरुद्द आक्रमण गरेको प्रहरी स्रोत बताउँछ ।

गिरीलाई केही समयदेखी दावाले धम्क्याएर मानसिक रुपमा तनाब दिएको अनुसन्धानबाट खुले पनि गिरीले भने केही बताउन चाहेनन् । दाबा समुहको फेरी संभाबित आक्रमणको खतराले उनले प्रहरीलाई सबै करा नखोलेको प्रहरी स्रोत थप बताउँछ। यसले गर्दा गिरीमाथि सुरक्षा चुनौती थपिएको छ ।

दावाका सहयोगीले अस्पतालमा उपचार गराइरहेका गिरीमाथि पुन: आक्रमण गर्ने सुचना पाएको प्रहरी स्रोत भन्छ- 'हामीले खोजी सुचीमा राख्दै आएको दाबा र उक्त समुहका कृयाकलाप नजिकबाट नियाली रहेका छौ,परिस्थिती अनुसार सो समुह चाडै नै कारवाहीमा पर्छ । '

गम्भीर घाइते भएका गिरीको लिखित उजुरीपछि काभ्रे घर भएका दावा लामा र कञ्चनपुर जिल्ला घर भइ हाल राजधानीमा गुन्डागर्दी गर्दै आएका प्रवीणलाई प्रहरीले आइतबार काठमाडौं जिल्ला अदालतमा म्याद थपका लागि हाजिर गराएको प्रहरी नायव उपरीक्षक रविन्द्र रेग्मीले जानकारी दिए । ‘ज्यानमार्ने उद्योगमा दावा लामा भनिने जितेन्द्र तामाङ र प्रवीण खड्कालाई पुर्पक्षका लागि ५ दिन थुनामा राख्न जिल्ला अदालत काठमाडौंले आइतबार आदेश दिएको छ’, उनले भने, ‘घटनाका विषयमा अनुसन्धान भइरहेको छ ।

शान्ति सुरक्षामा खलल पुगाउने जो कोहीलाई कारबाही हुन्छ ।’काभ्रे जिल्लामा बुद्धचित्त संकलनका साथै ठेक्कापट्टा, जवरजस्ती असुली, चन्दा आतंक, कुटपिट, अपहरणलगायतका आपराधिक क्रियाकलापमा संलग्न रहेको उजुरीका कारण दावालाई प्रहरीले पटक–पटक पक्राउ गरेर कारबाहीसमेत गरिसकेको छ ।तर, काभ्रेबाट प्रतिनिधित्व गर्ने सांसद तीर्थबहादुर लामासहितका कांग्रेसी नेताहरूको दबाबका कारण दावाले उन्मुक्ति पाउँदै आएको पीडितहरूको गुनासो छ । गिरीमाथि सांघातिक आक्रमण गरेर आफ्नो आतंक राजधानीमा देखाउन खोजेका दावालाई छुटाउन गृहमन्त्री विमलेन्द्र निधिलाई दबाब दिएको प्रहरी उच्च स्रोतले जनाएको छ ।गृहमन्त्री निधिको आडमा कांग्रेसका नेताहरूलाई दावाको मुद्दा मिलाउन शनिबार र आइतबार दिनभरि प्रहरी अधिकारीहरूलाई दबाब पुगेको स्रोतको भनाइ छ । दावा र प्रवीणको सांघातिक आक्रमणपछि टाउकोमा छ वटा टाँका लागेर गम्भीर अवस्थामा अस्पतालमा उपचार गराइ रहेका गिरीले दोषीलाई कानूनअनुसार कडा कारबाही गर्न मागसहित आफूले प्रहरीमा उजुरी दिएको बताए ।गुन्डा नाइके ‘चरी’ भनिने दिनेश अधिकारी र ‘घैँटे’ अर्थात कुमार श्रेष्ठ प्रहरी इन्काउन्टरमा मारिएपछि दुलाभित्र लुकेर बसेका गुन्डानाइकेहरू कांग्रेस नेता विमलेन्द्र निधि गृहमन्त्री भएसँगै फेरि सलबलाउन थालेका छन् । एसएसपी सर्बेन्द्र खनाल अपराध महाशाखा टेकुमा रहेका बेला राजधानीका गुन्डा नाइकेहरूलाई तह लगाएर शान्तिसुरक्षा बनाउन ठूलो भूमिका खेलेका थिए । उनको सरुवासँगै दावा लामा, प्रवीण खड्का जस्ता गुन्डा नाइकेहरूको क्रियाकलापले बढ्न थालेकोमा फेरि प्रहरी प्रशासनमाथि प्रश्न चिन्ह खडा गरिदिएको छ ।