बयानका लागि रास्वपा सभापति लामिछानेलाई काठमाडौँ ल्याइयो

काठमाडौँ ।
कास्की प्रहरीको हिरासतमा रहेका राष्ट्रिय स्वतन्त्र पार्टी (रास्वपा)का सभापति रवि लामिछानेलाई आज साँझ काठमाडौँ ल्याइएको छ। सहकारी ठगी प्रकरणमा अनुसन्धानका लागिका सभापति लामिछानेलाई आज साढे ५ बजेको जहाजबाट काठमाडौँ ल्याइएको हो । 

जिल्ला प्रहरी परिसर काठमाडौँका अनुसार उनलाई काठमाडौँको कालिमाटीमा रहेको स्वर्णलक्ष्मी सहकारीको रकम अपचलनबारे अनुसन्धानका लागि यहाँ ल्याइएको हो। उनलाई काठमाडौं ल्याउन लागिएपछि त्रिभुवन विमानस्थलको सुरक्षा व्यवस्था कडा पारिएको थियो । कडा सुरक्षा व्यवस्थाका बीच रविका समर्थकहरूले विमानस्थलबाहिर नाराबाजी गरेका थिए ।

सोही विषयमा परेको जाहेरीका आधारमा उनीविरुद्ध काठमाडौँ जिल्ला अदालतले पक्राउ पुर्जी जारी गरेको थियो। उनीमाथि जिल्ला सरकारी वकिल कार्यालय काठमाडौँमा सो प्रकरणबारे भोलिदेखि बयान लिइने छ। 

उनीमाथि पोखरामा सूर्यदर्शन सहकारीको रकम अपचलन, संगठित अपराध र सम्पत्ती सुद्धीकरणमा अनुसन्धान भइरहेको छ। 

यसअघि लामिछानेसँग रुपन्देहीको सुप्रिम सहकारी ठगी प्रकरणमासमेत बयान लिइसकिएको छ। उता चितवनको साहारा सहकारीको रकम अपचलनमा पनि  अनुसन्धानका लागि पक्राउ पुर्जी जारी भइसकेको छ। काठमाडौँपछि उनलाई चितवनमा लगेर बयान लिइने छ।