डन तह लगाउन हङकङबाट एसएसपी खनाललाई फोन

काठमाडौं । डन कुमार श्रेष्ठ ‘घैंटे’ प्रहरी मुठभेडमा मारिएपछि राजधानीका गुण्डाहरुको भागाभाग भएको छ । गुण्डाहरुबाट आजित व्यवसायीहरुले प्रहरीलाई धन्यवाद समेत दिएका छन् । तर नेपालका गुण्डाहरुले बिदेशमा समेत आफ्नो राज चलाउँदै  आएको खुलेको समाचार यूनाइटेड पोष्ट साप्ताहिकले छापेको छ । केही नेपाली गुण्डाहरुले नै हङकङमा दु:ख दिएको भन्दै त्यहाँका नेपाली व्यवसायीहरुले महानगरिय अपराध महाशाखाका एसएसपी सर्वेन्द्र खनाललाई फोन समेत गर्न थालेका छन् ।

 हङकङ नेपाली गुण्डाहरुको ट्रान्जिट सहर मानिन्छ । प्रहरीले खोजी गरेको थाहा पाउने वित्तिकै धेरै जना हङकङ पुग्ने गर्दछन् । उनीहरुको हङकङमा नेटवर्क नै रहेको स्रोत बताउछ । खासगरी चक्रे मिलनका हङकङमा धेरै सहयोगीहरु छन् । चक्रेसग हङकङको आईडी समेत छ । उनी पटक पटक हङकङ जाने गरेका छन् । हङकङमा रहेका नेपालीहरुसग समेत चक्रेले पैसा उठाउने गरेका छन् ।

  त्यस्तै बिशाल गुरुङ लगायतको विभिन्न नेपाली गुण्डाका समूहहरु हङकङमा बस्दै आएका छन् । उनीहरुलाई पनि ठिक पारिदिनुपर्‍यो भन्दै एसएसपी खनाललाई त्यहाा रहेका नेपालीहरुले फोन गर्दै आएको स्रोत बताउछ । त्यस्तै ललितपुरका कहलिएका गुण्डा नाइके मिनकृष्ण महर्जन र घैंटेका सहयोगी समिरमानसिंह बस्नेत दिल्ली पुगेका छन् ।दिपक मनाङ्गे भने कहिले मनाङ त कहिले काठमाडौं ओहोर दोहोर गरिरहेका छन् भने गणेश लामा पनि विदेश गएका छन् । मनाङ्गेले सहयोगी उमेश लामा मार्फत ठेक्का पट्टाको काम गरिरहेका छन् । लामा प्रहरीका उच्च अधिकारीहरुसग सम्पर्क बढाउदै मिटर व्याजको धन्दामा सक्रिय छन् ।

काभ्रेली समूहका छोटे डनले चिनिने विष्णु लामा पनि प्रहरी कारबाहीमा  पर्ने डरले गोवा पुगेको चर्चा छ । त्यस्तै काभ्रेली समूहकै लालकाजी लामाले दिपक अर्याल नामका एक दलालसग तीन लाखको तीन वर्षमा दश लाख असुलीसक्दा समेत व्याजको ताकेता गरेपछि अर्याल सम्पर्क विहिन भएका छन् । त्यसैगरी पाटनका मनोज खड्की, कालीमाटिका सुरेन प्रधान, ललितपुरका विरेन्द्र महर्जन पनि मिटर व्याजको धन्दामा सक्रिय छन् ।यतिखेर काभ्रेली समूहका गुण्डाहरु मिटर व्याजमार्फत कमाउ धन्दामा सक्रिय भएका छन् ।