होलीको दिन नियम मिच्ने २२ वटा सरकारीसहित ७०९ सवारी साधन कारबाहीमा

  काठमाडौं । ट्राफिक प्रहरीले होलीको दिनमा नियम मिच्ने र लापरबाही रूपमा सवारी चलाउने २२ वटा सरकारीसहित ७०९ सवारी साधनलाई कारबाही गरेको छ। कारबाहीमा पर्नेमा मापसे गरेर चलाइएका ६७ र लापरबाही गरी चलाइएका ३४ सवारी साधन रहेका छन्।

त्यस्तै, कागजपत्र नलिइकन चलाइएका ३०८ हेलमेट नलगाइकन चलाइएका २६, तीन जना राखेर चलाइएका ७१ र अन्य ३० सवारी साधनलाई प्रहरीले कारबाही गरेको छ।

ट्राफिक प्रहरी प्रवक्ता जयराम सापकोटाका अनुसार यीमध्ये १ सय ५३ लाई तत्काल कारबाही गरेर छाडिएको थियो भने ५ सय ५७ सवारी साधनलाई नियन्त्रणमा लिइएको छ । 

होेली पर्वमा जथाभावी सवारी साधन चलाउँदा स्वयम्भु र सातदोबाटोमा भएको दुर्घटनामा २ जनाको मृत्यु भएको र ३ जनाको अवस्था जटिल छ। ती दुर्घटनामा काठमाडौँ कीर्तिपुरका ३१ वर्षीय सुनिल शाही र ललितपुर गोदावरीका १७ वर्षीय सचिन श्रेष्ठको मृत्यु भएको थियो।

महानगरीय ट्राफिक प्रहरी महाशाखाका प्रमुख एवम् प्रहरी वरिष्ठ उपरीक्षक वसन्त पन्तले घाइतेहरूको स्वयम्भुस्थित मनमोहन मेमोरियल अस्पताल र सातदोबाटोस्थित सुमेरु अस्पतालमा उपचार भइरहेको जानकारी दिए।

होलीमा बुधबार मात्र काठमाडौं उपत्यकाका स्थानमा १० दुर्घटना भएका थिए। गत वर्षको होलीमा २२ सवारी साधान दुर्घटना हुँदा १८ घाइते भएका थिए।