प्रमुख प्रतिपक्ष कांग्रेसमाथि यसरी खनिए नेकपाका महासचिव पौडेल

  काठमाडौं । सत्तारुढ दल नेपाल कम्युनिष्ट पार्टी (नेकपा) का महासचिव विष्णु पौडेल प्रमुख प्रतिपक्षी दल नेपाली कांग्रेसमाथि खनिएका छन् ।

सामाजिक सुरक्षा भत्ता बृद्धिलगायत लोककल्याणकारी व्यवस्थाको आलोचना भइरहेकोमा असन्तुष्टि जनाउँदै उनले सामाजिक सुरक्षा भत्ता बृद्धि बेठीक हो भने औपचारिक रुपमा बोल्न कांग्रेसलाई चुनौती दिएका हुन् ।

आज संसदमा बजेटमाथिको छलफलमा भाग लिने क्रममा प्रतिनिधिसभामा बोल्दै पूर्व अर्थमन्त्री समेत रहेका महासचिव पौडेलले भने–‘सामाजिक सुरक्षा भत्ता बृद्धिका सन्दर्भमा जुन कोणबाट आलोचना भइरहेका छन्, हिम्मत छ भने बेठीक हो भनेर औपचारिक ढंगले भन्ने आँट गर्नुपर्छ । नत्र लोक कल्याणका लागि राज्यले गरेको सकारात्मक जिम्मेवारी बहनको आलोचना नगरौं ।’

पौडेलले बजेटको लक्ष्य पूरा हुँदा ५ लाख भन्दा बढी रोजगारी सिर्जना हुन सक्ने भन्दै ठूला पुर्वाधार विकासमा तीब्रता आउने लक्षण देखिएको बताए । उनले बजेट कार्यन्वयनको चुनौति समाधानका लागि सिंगो राष्ट्र एक ठाउँमा उभिनुपर्ने बताए ।