राष्ट्रपति र प्रधानमन्त्रीसहित शिर्ष नेताहरुसँग चिनियाँ विदेशमन्त्रीको भेटघाट

  काठमाडौं । तीन दिने नेपाल भ्रमणमा रहेका चिनियाँ विदेशमन्त्री वाङ यीले प्रमुख प्रतिपक्षी दल नेपाली कांग्रेसका सभापति शेरबहादुर देउवा र नेकपाका अध्यक्ष पुष्पकमल दाहाल ‘प्रचण्ड’ सँग पनि भेटवार्ता गरेका छन्।

विदेशमन्त्रीस्तरीय नेपाल–चीन संयन्त्र बैठकका लागि आइतबार नेपाल आएका विदेशमन्त्री यी आज पूर्वप्रधानमन्त्रीद्वय प्रचण्ड र देउवासँग नक्सालस्थित मेरिअट होटलमा भेटवार्ता गरेका हुन् । भेटवार्तामा दुई देशको आपसी हितलगायत विषयमा कुराकानी भएको जनाइएको छ ।

आज बिहान भक्तपुर घुमेर फर्किएका वाङले प्रचण्ड र देउवासँग छुट्टाछुट्टै भेटवार्ता गरेका हुन्। उनले सोमबार प्रधानमन्त्री र राष्ट्रपतिसँग भेटवार्ता गरेका थिए। सोमबार नै दुई देशबीच मन्त्रीस्तरीय औपचारिक छलफल भएको थियो। नेपाल र चीनबीच तीनबुँदे समझदारीमा हस्ताक्षर भएको थियो।

चीनका राष्ट्रपति सी चिनफिङको आसन्न नेपाल भ्रमणको तयारीका लागि विदेशमन्त्रीको भ्रमणलाई लिएको छ।

सोमबार भएका भेटवार्ताहरुमा वाङले ‘राष्ट्रपतिको भ्रमण उपयुक्त समयमा हुने’ बताएका छन् । ‘हामीले यो भ्रमणको उपयुक्त समय हो भनेका छौं’ परराष्ट्रमन्त्री ज्ञवालीले भने, ‘राजनीतिक संक्रमण अन्त्य गरेर स्थिरतातर्फ उन्मुख भएको यो समयमा छिमेकी मुलुकहरुबाट हुने भ्रमणले हामीलाई भरोसा पनि मिल्छ ।’