नेपाली युवा दिवेश पोखरेल अमेरिकन आइडलको टप १० मा प्रवेश

काठमाडौं ।
अमेरिकन आइडलको अडिसनदेखि नै  निर्णायकहरुको तारिफ पाउँदै आएका नेपाली युवा दिवेश पोखरेल अमेरिकन आइडलको टप १० मा प्रवेश गरेका छन् । जोन डेनभरको चर्चित गीत ‘कन्ट्री रोड’ गाउँदै उनले अमेरिकाको प्रख्यात गायन रियालिटी शो अमेरिकन आइडलको टप १० मा आफ्नो स्थान सुरक्षित गरेका हुन् ।

उनलाई टप ५ को दावेदारका रुपमा हेरिएको छ । अमेरिकन आइडलमा उनले आफूलाई ‘अर्थर गन’ नामले चिनाएका छन् ।

टप १० मा छनोट भएपछि दिवेशले आफ्ना समर्थकहरुलाई धन्यवाद दिएका छन् । उनले संसारभरबाट आफूलाई ठूलो माया र हौसला प्राप्त भइरहेको उल्लेख गरेका छन् ।
सन् २०१४ मा उच्च शिक्षा अध्ययनका सिलसिलामा अमेरिका गएका दिवेश संगीतमा समर्पित भएर लागेको दुई वर्ष मात्रै भयो । काठमाडौंको एस कलेज इन्स्टिच्यूटमा व्यवस्थापनमा प्लस टु उत्तीर्ण गरेपछि उनी अमेरिका गएका थिए ।