नेपालमा एकैदिन ३० जनालाई संक्रमण, हालसम्म ४५७ संक्रमित र ३ जनाको मृत्यु

काठमाडौं । नेपालमा एकै दिन थप ३० मा कोरोना संक्रमण देखिएको छ । स्वास्थ्य मन्त्रालयले बिहीबार साँझ जारी गरेको विज्ञप्तिअनुसार थप ३ जनामा संक्रमण देखिएपछि नेपालमा बिहीबार मात्रै संक्रमित हुनेको संख्या ३० पुगेको हो ।

मन्त्रालयद्वारा बिहीबार बिहान १७ जनालाई कोरोना भएको पुष्टी गरेको थियो भने नियमित आयोजना गरिँदै आएको कोरोना अपटेडमा थप ९ जनामा कोरोना भएको बताएको थियो । त्यसपछि १ जना दाङमा संक्रमित भेटिएका थिए ।

त्यस्तै मन्त्रालयद्वारा साँझ जारी विज्ञप्तिमा थप ३ जनामा कोरोना संक्रमण भेटिएको पुष्टी भएपछि नेपालमा एकैदिन ३० जनामा संक्रमण र १ जनाको मृत्यु भएको जनाइएको छ ।

मृत्यु हुनेमा गुल्मी स्थायी घर भई रुपन्देहीमा उपचार गराइरहेका एक पुरुष भएको जनाइएको छ । हालसम्म नेपालमा ४ सय ५७ जना संक्रमितको पहिचान भएको छ भने ३ जनाको मृत्यु भएको छ ।