च्याम्पियन्स लिगः कीर्तिमानबीच रोनाल्डोको गोल, म्यानचेस्टर युनाइटेडको जित

काठमाडौं । च्याम्पियन्स लिगअन्तर्गतको सम्पन्न खेलमा म्यानचेस्टर युनाइटेडले पुनरागमन जित निकालेको छ । युनाइटेडले बुधबार च्याम्पियन्स लिगको समूह चरणमा जित हासिल गरेको हो ।

भिल्लारियलविरुद्धको खेलमा एक गोलले पछि परेको अवस्था उल्ट्याउँदै युनाइटेडले २–१ को पुनरागमन जित निकालेको हो । युनाइटेडको जितमा एलेक्स टेलेस र क्रिष्टियानो रोनाल्डोले गोल गरे । भिल्लारियलका लागि पाको अल्कासरले गोल गरे ।

यसैबीच क्रिस्टियानो रोनाल्डोले च्याम्पियन्स लिगमा कीर्तिमान बनाएका छन् । पोर्चुगिज फरवार्ड रोनाल्डोले सर्वाधिक धेरै च्याम्पियन्स लिग खेल्ने खेलाडीको कीर्तिमान बनाएका हुन् ।

भिल्लाविरुद्धको खेल रोनाल्डोका लागि १ सय ७८औँ च्याम्पियन्स लिग खेल हो । रोनाल्डोले इकर क्यासिलासको कीर्तिमान तोडेका हुन् । रियल मड्रिडका पूर्वगोलकिपर इकरले १ सय ७७औँ च्याम्पियन्स लिग खेलेका छन् ।