श्रीलङ्काः देश छोडेर भागेका राष्ट्रपति गोटाबय राजपक्ष माल्दिभ्सबाट सिङ्गापुर उडे

श्रीलङ्कामा विरोधप्रदर्शन चर्किएपछि अकस्मात् देशबाट पलायन भएर माल्दिभ्स पुगेका राष्ट्रपति गोटाबय राजपक्ष त्यहाँबाट सिङ्गापुरतिर गएको विभिन्न स्रोतहरूले बीबीसीलाई बताएका छन्।

उनी माल्दिभ्सबाट सिङ्गापुर जाने साउदी एअरलाइन्सको एउटा विमानमा चढेको बताइएको छ।

अभूतपूर्व आर्थिक सङ्कटको विरोधमा देशमा विरोधप्रदर्शन भइरहेका बेला उनी मङ्गलवार राति भागेर माल्दिभ्स पुगेका थिए। उनीसँग उनकी पत्नी र दुई अङ्गरक्षक पनि थिए।

राजपक्ष सिङ्गापुरमै बस्छन् वा अन्यत्र जान त्यो उनको बिसौनी मात्र हो भन्ने स्पष्ट छैन।

यसअघि उनले बुधवारभित्र राजीनामा दिने बताएका थिए। तर उनले अहिलेसम्म औपचारिक रूपमा पदत्याग गरेका छैनन्।

राष्ट्रपति हुँदा अभियोगहरूबाट उन्मुक्ति पाएका राजपक्ष नयाँ सरकार बनेपछि हुनसक्ने गिरफ्तारीबाट जोगिन विदेश भागेको अनुमान गरिएको छ।

श्रीलङ्कामा कर्फ्यू

देश छाडेपछि राष्ट्रपति राजपक्षले प्रधानमन्त्री रनिल विक्रमसिङ्घ कार्यवाहक राष्ट्रपति नियुक्त गरेको समाचार आयो।

त्यसपछि विक्रमसिङ्घले देशमा सङ्कटकाल घोषणा गरे। उनले बिहीवार दोस्रो दिन कर्फ्यू घोषणा गरेका बेला राजपक्ष माल्दिभ्सबाट सिङ्गापुरतर्फ लागेको खबर आएको हो ।तस्बिर स्रोत,REUTERS

विक्रमसिङ्घले स्थानीय समयानुसार बिहीवार १२ बजेदेखि शुक्रवार बिहान ५ बजेसम्मका लागि कर्फ्यू घोषणा गरेका छन्।

अहिले श्रीलङ्कामा प्रदर्शन जारी छ। प्रदर्शनकारीहरूले विक्रमसिङ्घको पनि राजीनामा मागिरहेका छन्।

गोटाबय राजपक्ष अब कहाँ जालान् भन्ने धेरैको जिज्ञासा छ। तर सोधिनुपर्ने सबैभन्दा महत्त्वपूर्ण प्रश्न उनलाई कसले आश्रय देला भन्ने हो।

राजपक्ष अहिले सिङ्गापुरतर्फ लागेका छन्। त्यो उनको मध्यपूर्व जाने ट्रान्जिट मात्र हो वा उनी त्यहीँ बस्छन् भन्ने स्पष्ट छैन। अनि बसिहाले भने त्यहाँ कति समयका लागि बस्छन् भन्ने पनि थाहा छैन।

तर स्रोतहरू के भन्छन् भने सिङ्गापुर सरकारले उनलाई त्यहाँ लामो समयसम्म बस्न दिन्छ भन्ने कुरा सन्देहपूर्ण छ।

उक्त समृद्ध सानो राष्ट्रले विगतमा विवादास्पद व्यक्तित्वहरूलाई बस्न दिएका उदाहरणहरू छन्। उदाहरणका लागि, सिङ्गापुरमा बर्माका सैन्य नेता थेन सेन, जिम्बाब्वेका रोबर्ट मुगाबे र उत्तर कोरियाका किम जङ-अन पनि त्यहाँ बसेका थिए।

तर राजपक्षलाई लामो समयसम्म आश्रय दिने उनीहरू पनि तयार नहुन सक्छन्।

किनभने राजपक्ष युद्धअपराधको आरोप लागेका व्यक्ति हुन्। त्यसले गर्दा उनी विश्वव्यापी गहिरो छानबिनको दायरामा जान सक्छन्।

उनी देश आर्थिक रूपले ध्वस्त भएका बेला भागेका छन्। सिङ्गापुरले त्यति धेरै अन्तर्राष्ट्रिय आलोचनलाई पक्कै थाम्न सक्नेछैन।

सिङ्गापुरका अधिकारीहरूले आफ्नै जनताबाट पनि आलोचना खेप्नुपर्नेछ किनकि पछिल्ला वर्षहरूमा सिङ्गापुरका जनताहरू पनि निकै मुखर बन्न थालेका छन्।

उक्त देशमा उल्लेख्य मात्रामा तमिल समुदायका मानिसहरू छन्। तीमध्ये कतिपय श्रीलङ्कासँग परम्परागत सम्बन्ध भएकाहरू पनि छन्।

राजपक्ष रक्षामन्त्री भएका बेला हजारौँ तमिल सर्वसाधारणको हत्या गर्न उनले अनुमति दिएको आरोप पनि लाग्ने गरेको छ।

उनको उपस्थितिले सिङ्गापुरस्थित कैयौँ तमिलहरू क्रुद्ध हुनेछन्। त्यसले त्यहाँ कायम शान्ति खल्बलिन सक्छ।

प्रदर्शनकारीको मृत्यु

कोलम्बोमा बुधवार भएको प्रदर्शनका क्रममा एक जनाको मृत्यु भएको तथा अन्य ८४ जना घाइते भएको अस्पतालका अधिकारीहरूले बताएका छन्।

प्रहरीले प्रदर्शनकारीमाथि अश्रुग्यास प्रहार गर्दा २६ वर्षीय एक व्यक्तिको श्वासप्रश्वाससम्बन्धी कठिनाइका कारण निधन भएको बताइएको छ।

कोलम्बो न्याश्नल हस्पिटलका अधिकारीहरूका अनुसार घाइते हुनेहरूमा प्रधानमन्त्री कार्यालयबाहिर र साँझ संसद् भवनबाहिर प्रदर्शन गर्नेमध्येका छन्।

प्रधानमन्त्री कार्यालयभित्र प्रवेश गर्नुअघि उक्त भवनको मुख्यद्वार खोल्न खोज्ने प्रदर्शनकारीहरूमाथि प्रहरीले अश्रुग्यास प्रहार गरेको थियो। उनीहरू पछि संसद्‌ भवनतर्फ पनि उस्तै प्रदर्शन गर्न गएका थिए।

बीबीसीसँग कुराकानी गरेका एक सैन्य प्रवक्ताले घाइते हुनेहरूमा सैनिक र प्रहरी अधिकृतहरू पनि रहेको बताएका छन्।

उनले गोलाबारुदसहितको एउटा राइफल चोरिएको र अहिलेसम्म त्यो कहाँ छ भन्ने पत्ता नलागेको आरोप लगाए।

देशमा उत्पन्न आर्थिक सङ्कट र चरम महँगीका लागि धेरैले राजपक्ष सरकारलाई दोष दिने गरेका छन्।

बुधवारको टेलिभिजन सम्बोधनमा विक्रमसिङ्घले आफ्नो कार्यालयसहित अन्य सरकारी भवनहरूबाट पछि हट्न र अधिकारीहरूलाई सहयोग गर्न प्रदर्शनकारीलाई आह्वान गरेका थिए।

उनले सेनालाई "सुव्यवस्था कायम गर्न जे आवश्यक हुन्छ त्यही गर्न" आदेश दिएका थिए।

राष्ट्रपति देशबाट बाहिरिएपछि श्रीलङ्कामा सम्भावित शक्ति सङ्कट उत्पन्न हुन सक्ने देखिएको छ।

तर देशलाई आर्थिक सङ्कटबाट पार लगाउन त्यहाँ एउटा पूर्णरूपमा काम गर्न सक्ने सरकार आवश्यक छ।

अन्य दलका नेताहरू नयाँ सर्वदलीय सरकार बनाउनका लागि छलफलमा छन् तर हालसम्म उनीहरू कुनै सम्झौतामा पुगेको जस्तो सङ्केत देखिएको छैन।

उनीहरू सहमत हुने कुरालाई जनताले स्वीकार्छन् वा स्वीकार्दैनन् भन्ने पनि स्पष्ट छैन।

बुधवार एउटा प्रेस वक्तव्यमा विक्रमसिङ्घको समूहले उनले संसद्का सभामुखलाई नयाँ प्रधानमन्त्री मनोनयन गर्न भनेको जनाएको थियो।

तर त्यस्तो व्यक्ति "सरकार र प्रतिपक्ष दुवैका लागि स्वीकार्य हुनुपर्ने" भनिएको त्यसमा उल्लेख छ।

गत सोमवार प्रमुख प्रतिपक्षी नेता सजित प्रेमदासले आफू राष्ट्रपति बन्न तयार रहेको बीबीसीलाई बताएका थिए। तर उनलाई पनि जनसमर्थन छैन।