एमाले अध्यक्ष ओलीलाई आरजुको सुझाब - चश्माको सट्टा अब दूरविन प्रयोग गर्नुस्

धनगढी ।  कैलाली–५ मा कांग्रेसबाट प्रतिनिधिसभा सदस्य उम्मेदवार बनेकी आरजु राणा देउवाले एमाले अध्यक्ष केपी ओलीलाई चश्माको सट्टा दूरविन प्रयोग गर्न सुझाव दिएकी छन् ।  बुधबार बिहान आयोजित चुनावी सभालाई सम्बोधन गर्दै राणाले  नेपालको संविधान पनि पढ्न ओलीलाई आग्रह गरेकी छन ।

 नेपालको संविधानमा कोही पनि नागरिक कहीं पनि जन्मिएर कहीं पनि उठ्न पाउने प्रावधान हुँदा हुँदै आफु बिरिद्द ओली नियोजित रुपमा लागेको आरजुको भनाइ छ । माओवादी अध्यक्ष प्रचण्ड कहिले कीर्तिपुर, कहिले सिरहा, कहिले चितवनबाट उठिरहेको प्रसंग कोट्याउँदै उनले भनिन्, ‘उहाँचाहिँ टुरिस्ट नहुने । महिला भएकाले मलाई हेपेको हो, ओलीजी ? महिलालाई हेर्ने तपाईंको दृष्टि नमिलेजस्तो लाग्यो । तपाईंको दृष्टिलाई चश्मा होइन, टेलिस्कोप नै चाहिन्छ ।’ केही दिन अघि ओलीले आरजुलाई टुरिस्ट उम्मेदवार भन्दै आरोप लगाएका थिए ।