सिरियल किलर मनोज पुन प्रहरी इन्काउन्टरमा मारिए

काठमाडौ। दुई वर्षदेखि राजधानीलगायत देशको पश्चिम क्षेत्रमा अपरहरण,हत्या र फिरौती आतंक मच्चाउँदै आएका सिरियल किलर मनोज पुन प्रहरी इन्काउन्टरमा मारिएका छन्।

 बुधबार बिहान केन्द्रीय अनुसन्धान ब्यूरो(सिआईबी) टोली र रुपन्देही प्रहरीको टोलीसँग  भिडन्त हुँदा गोली लागेर उनी मारिएका हुन्। रुपन्देहीको देवहद नगरपालिका ४ भवानीपुरमा प्रहरीसँग जम्काभेट हुँदा आक्रमण गरी भाग्न खोजेको प्रहरीले दाबी गरेको छ । पुनसँगै उनका सहयोगी सोम आले पनि मारिएका छन् । तर, पुन केही दिन अघी पक्राउ परेको समाचार बाहिर आएको थियो ।

 घटनास्थलमा घाइते भएका उनलाई उपचारका लागि लुम्बिनी अञ्चल अस्पतालमा लगिएको र त्यहा उनको मृत्यु भएको प्रहरीले दाबी गरेको चाह । पुन विगत ३ वर्षदेखि मोष्ट वान्टेड थिए । नेपाल निर्माण व्यवसायी महासंघका अध्यक्ष शरदकुमार गौचनको हत्यापछि नेपाल प्रहरी उनलाई पक्राउ गर्न सक्रियताका साथ खटेको थियो ।

 हत्या, जवर्जस्ती असुली, धम्की दिने काममा संलग्न रहेर आतंक मच्चाउँदै आएका पुनलाई प्रहरीको केन्द्रीय अनुसन्धान व्यूरो (सिआइबी) बाट खटेको टोलीले पक्राउ गरेको समाचारले सनसनी मच्चिएको थियो । बुटवलमा यूवा संघका नेताहरुको हत्यामा संलग्न रहेको पुन समूहले काठमाडौंमा बस्नेत समूहसँग मिलेर अध्यक्ष गौचनको हत्या गरेको थियो । त्यस्तै युवा संघ रुपन्देहीका अध्यक्ष दुर्गा तिवारी र काठ व्यापारी बलु पौडेलको हत्यामा पनि पुनको संलग्नता रहेको छ ।