आज आउला त सन्दीपको पालो ?

   काठमाडौं । भारतमा जारी इन्डियन प्रिमियर लिग (आईपीएल) क्रिकेट हेर्नेमा नेपाली दर्शक पनि उल्लेख्य छन् । हुनत विश्वमा सबैभन्दा बढी हेरिने टी–२० व्यवसायिक क्रिकेटमध्ये पर्दछ आइपीएल।

गत वर्षदेखि नेपाली बलर सन्दीप लामिछाने जोडिएपछि आईपीएल हेर्ने नेपाली दर्शकको संख्या बढेको हो । दिल्ली क्यापिटल्स (गत संस्करणसम्मको दिल्ली डेयर डेभिल्स) ले सन्दीपलाई लिनुको कारण पनि नेपाली बजारमा व्यवसाय गर्नु नै हो । नेपाल मन जित्नु नै हो ।

गत संस्करणमा अन्तिम तीन खेलमात्र खेल्न पाएका सन्दीपलाई खेलाउनका लागि भनी माथिबाटै दवाव दिल्लीलाई आएको चर्चा चलेको थियो ।

एक होनहार खेलाडीलाई एक्स्ट्रामा मात्र राखेको दिल्लीले अन्तिम तीन खेलमा खेलाउँदा सन्दीपले आफ्नो चमत्कार देखाइदिए । त्यतिबेला उनले ५ विकेट लिएका थिए ।

यसपटक सन्दीपलाई सुरु देखि नै खेलाउने अपेक्षा विपरीत पहिलो खेलमा खेलाएन । तर, उनको टिमले भने जित्यो । यसरी खेल जित्दा जितिरहेको सेटबाट खेलाडी परिवर्तन गर्न समस्या हुने देखिन्छ ।

यो तर्कलाई कायम राख्ने हो भने दिल्लीले मंगलबार राति दोस्रो खेलमा चेन्नई सुपर किंगसंग खेल्दैगर्दा सन्दीपले खेल्ने सम्भावना कम छ । खेल घरेलु मैदानमा राति ८ः१५ बजेदेखि हुँदैछ । तर, सामाजिक संजालमा भने सन्दिपलाई खेलाउनु पर्ने आवाज उठिरहेको छ ।

चेन्नईले पहिलो खेलमा रोयल च्यालेन्जर्स बैंगलोरलाई हराएको थियो । दिल्लीले पनि मुम्बई इन्डियन्सलाई उसैको मैदानमा हराएर उत्कृष्ट सुरुआत गरेको छ ।