कलकत्ताको लगातार दोस्रो जित

   काठमाडौं । इन्डियन प्रिमियर लिग (आईपीएल) क्रिकेटमा बुधबार राती भएको खेलमा कलकत्ता नाइट राइडर्सले लगातार दोस्रो जित हात पारेको छ । इडेन गार्डन्समा भएको खेलमा घरेलु टोली कलकत्ताले किंग्स इलाभेन पञ्जाबलाई २८ रनले पराजित गरेको हो ।

इण्डियन प्रिमियर लिग (आईपीएल) क्रिकेटको बुधबारको खेलमा किंग्स इलाभेन पन्जाब कलकत्ता नाइटराइडर्ससँग २८ रनले पराजित भयो । पन्जाबले जितका लागि २१९ रनको लक्ष्य पाएको थियो तर उसले निर्धारित २० ओभरमा चार विकेट गुमाउँदै केबल १९० रन बनाउन सक्यो ।

पन्जाबलाई शुरुमा तब ठूलो झड्का लाग्यो, जब केएल राहुल जम्मा एक रन बनाएर आउट भए । त्यसपछि गत संस्करणमा ७९ रन बनाएका र यसपटक धमाकेदार शुरुवात गरेका क्रिस गेल २० रनमा आन्द्रे रसेलको शिकार भए । क्रिस गेलपछि रसेलले सरफराज खानलाई पनि सस्तैमा आउट गरे । सरफराज खानले केबल १३ रन बनाए ।

पन्जाबका लागि मायांक अग्रवालले ५८ रन बनाए । त्यस्तै, डेभिड मिल्लरले अविजित ४३ रन बनाउँदा मन्दीप सिंहभने ३३ रनमा अविजित रहे । विष्फोटक ब्याट्सम्यान क्रिस गेलले भने २० रन बनाए ।बलिङतर्फ कलकत्ताका आन्द्रे रुसेलले २ विकेट लिए ।

यसअघि टस हारेर पहिले ब्याटिङ गरेको कलकत्ताले निर्धारत २० ओभरमा चार विकेटको क्षतिमा २१८ रनको विशाल योगफल तयार पारेको थियो ।

कलकत्ताका लागि रविन उथप्पाले विष्फोटक ब्याटिङ गर्दै अविजित ६७ रन बनाए । उनले ५० बलमा ६ चौका र दुई छक्का प्रहार गरे । त्यस्तै, नितिश रानाले ६३ रन बनाए । ३४ बलको सामना गरेका नितिशले सात छक्का र दुई चौका प्रहार गरे । त्यस्तै, कलकत्ताका लागि आन्द्रे रुसेलले उत्कृष्ट प्रदर्शन गर्दै १७ बलमै ४८ रन बनाए । उनले ५ छक्का र तीन चौका प्रहार गरे ।

बिहीबारको खेलमा रोयल च्यालेन्जर्स बैंग्लोर आफ्नै घरमा मुम्बइ इन्डियन्ससँग खेल्ने छ ।