कुल पुजाका लागि हिंडेको जीप दुर्घटना हुँदा १४ जनाको मृत्यु, ३ जना घाइते

  काठमाडौं । बागलुङको भीमगिठेमा जीप दुर्घटना हुँदा १४ जनाको मृत्यु भएको छ भने ३ जना घाइते भएका छन् ।

बागलुङ प्रहरीका अनुसार १८ जना सवार उक्त जिपका एक यात्रु भने अहिलेसम्म बेपत्ता छन् ।

गुल्मीको इश्मा गाउँपालिकाबाट कूल पूजाका लागि गुल्मी जाँदै गर्दा कार्की परिवार चढेको ग१ज ५२१९ नम्बरको जीप बागलुङको बडीगाड गाउँपालिका–७ स्थित सडकबाट करिब ५०० मिटर तल खोलामा खसेको प्रहरीले जनाएको छ ।

दुर्घटनामा परी ९ महिला, ४ जना पुरुष र एक जना बालकको घटनास्थलमै मृत्यु भएको जिल्ला प्रहरी कार्यालय बागलुङले जनाएको छ ।

अन्य ३ जना गम्भीर घाइते भएका छन् भने एक जना खोलाले बगाएर बेपत्ता भएको प्रहरीले जनाएको छ ।

घाइतेलाई प्राथमिक उपचारका लागि उद्धार गरी बुर्तिबाङ लगेर थप उपचारको काठमाडौं ल्याउने तयारी भइरहेको पनि प्रहरीले जनाएको छ।