रामकृष्ण ढकालको ‘अधर’ मा विष्णु र रोश्नाको रोमान्स

 

 

काठमाडौं । बेलायतका लागि नेपाली राजदुत डा. दुर्गाबहादुर सुवेदीको शब्द र गायक रामकृष्ण ढकालको स्वर रहेको गीत ‘अधर’को भिडियो श्रोतामाझ आएको छ । भिडियो दशैँको अवसर पारेर सार्वजनिक गरिएको हो । गीतमा संगीत शिखर सन्तोषले भरेका छन् । भिडियो बेलायतको लण्डनस्थित विभिन्न रमणीय एवं रिच लोकेशनमा खिचिएको छ । प्रायः बलिउड र हलिउड चलचित्रमा देखिने लण्डनका दृश्यहरु ट्राफलगर स्क्वायर, अक्सफोर्ड स्ट्रिट, ओटु एरिनालगायतका स्थानहरु यस भिडियोमा देख्न सकिन्छ ।

डा.दुबसु क्षेत्री नेश्नल डेभेलपमेन्ट फाउण्डेसनको प्रस्तुतिमा लण्डनस्थित केके मुभिजसँगको सहकार्यमा म्यूजिक भिडियो तयार भएको हो, जसमा सञ्चारकर्मी एवं निर्देशक कुशल श्रेष्ठको छायाँकन, सम्पादन तथा निर्देशन छ । भिडियो स्तरिय बनाउन कुनै कसर नछोडेको निर्देशक श्रेष्ठले बताए । साथै, भिडियोमा सह–निर्देशन आशिष श्रेष्ठ र रंग संयोजन नविन निरौलाले गरेका छन् ।

बेलायती नेपाली समुदायमा सफल व्यवसायी र समाजसेवीका रुपमा स्थापित विष्णु खरेल यस भिडियोमार्फत मोडलिङमा पाइला टेकेका छन् । खरेलको पहिलो भिडियो भएपनि उनको प्रस्तुतिमा कुनै कमि देखिएको छैन । साथै, अवसर पाए आफुलाई निखार्दै व्यवसायसँगै अभिनयलाई पनि लैजाने इच्छा रहेको मोडल खरेलले बताए ।

उनलाई बेलायतमा स्थापित मोडल रोश्ना कार्कीले साथ दिएकी छन् । कार्कीले बेलायतमै निर्मित आधा दर्जन भिडियोमा अभिनय गरिसकेकी छन् । हालसम्म आफुले गरेको भिडियोमध्ये अधर उत्कृष्ठ रहेको उनले जिकिर गरिन् । बेलायतस्थित नेपाली दुतावासमा एक समारोहबीच उक्त म्युजिक भिडियो सार्वजनिक गरिएको थियो ।