भुवनले ल्याए बिहेको खबर

काठमाडौं । गायक तथा संगीतकार भुवन सुप्तिहाङ राईले आफ्नो पछिल्लो एल्बम ‘सम्मान मेरो’को एउटा गीत यु–ट्युबमार्फत सार्वजनिक गरेका छन् ।

केही वर्षयता अमेरिकामा बस्दै आएका गायक भुवनले ‘तिम्रो बिहेको खबर थाहा पाएँ’ बोलको गीतलाई लिरिकल भिडियोमा ल्याएका हुन् । जुन गीतमा भुवनकै संगीत तथा स्वर रहेको छ । उक्त गीतको लिरिकललाई भिडियोलाई गायक भुवनले आफ्नै अफिसियल यु–ट्युब च्यानल ‘भुवन सुप्तिहाङ राई’मार्फत सार्वजनिक गरेका हुन् । यस गीतमा शब्दरचना प्रेम सुब्बा चेम्जोङको रहेको छ ।

नेपाली सुगम संगीतका लागि चर्चित गायक तथा संगीतकार भुवन पछिल्लो समय गायनमा भन्दा बढी संगीत सिर्जनालाई प्राथमिकता दिँदै आएका छन् । ‘मलाई गाउनुभन्दा संगीत सिर्जना गर्दा आनन्द लाग्छ’ उनले भने, ‘तर, गायनबाटै संगीत क्षेत्रमा प्रवेश गरेका कारण गाउँदै पनि आएको छु ।’

अमेरिका जस्तो व्यस्त देशमा रहेरपनि भुवनले नेपाली गीतसंगीतलाई निरन्तरता दिँदै आएका छन् । उनी भन्छन्, ‘जहाँ पुगेपनि मेरो गीतसंगीतप्रतिको लगाव टुट्दैन । मेरो संगीतसँग प्रेम बसेको छ ।’ भुवनको केही समयअघि मात्र पर्यटनसम्बन्धी गीत सार्वजनिक भएको थियो ।