किम्फमा ‘धौलागिरी एसेन्ट टु दि ह्वाइट माउन्टेन’उत्कृष्ट

काठमाडौं : भुटानी फिल्म ‘हेमा हेमा सिङ मी अ सङ ह्वेन आउ वेइट’ प्रदर्शनसँगै काठमाडौं अन्तर्राष्ट्रिय पर्वतीय फिल्म महोत्सव ‘किम्फ’ समापन भएको छ। अर्जेन्टिनाको फिल्म ‘धौलागिरी एसेन्ट टु दि ह्वाइट माउन्टेन’उत्कृष्ट घोषित भयो। फिल्मलाई गुलिएर्मो ग्लास र क्रिस्टियन हारबरुकले निर्देशन गरेका हुन्। फिल्मले १५ सय अमेरिकी डलर पुरस्कार हात पार्‍यो। दोस्रो स्थानमा एन्डी कक्रम निर्देशित ‘शेर्पा स्टिउ’ र हेवन जी निर्देशित ‘सिङ्गिङ विथ एङ्ग्री वर्ड’ तेस्रो स्थानमा रह्यो। फिल्महरुले क्रमशस् एक हजार र पाँच सय अमेरिकी डलर हात पारे। बेन नाइट निर्देशित ‘द लास्ट हनि हन्टर’ले स्पेसियल मेन्सन र अडियन्स च्वाइज जित्यो। त्यस्तै उजतेक कोजाकेविच निर्देशित ‘मामा’ले जुरी अवार्ड पायो। फिल्म महोत्सवमा आयोजित अन्तराष्ट्रिय प्रतिस्पर्धामा १४ फिल्म थिए। जसमध्ये नेपाल पानोरमा अन्तर्गत फिक्सन फिल्म ‘जालगेडी’उत्कृष्ट ठहरियो। फिल्म निर्देशकले ७५ हजार प्राप्त गर्यो। त्यस्तै स्पेसियल मोन्सन अवार्ड ‘झालो’ले पायो। नेपाल पानोरमा अन्तर्गत डकुमेन्ट्री विधामा ‘ग्याल्मुज हाउस’ उत्कृष्ट ठहरियो। उत्कृष्ट इसिमोड फिल्म ‘एट द क्रसरोड्स’ बन्यो भने डकपिच अवार्ड ‘मङ्की बिजनेस’ले जित्यो । नेपालको चलचित्र समीक्षक समाजले दिएको ‘क्रिटिक्स च्वाइस अवार्ड’ फिल्म ‘बल्ड रोड’लाई दिइयो। समीक्षक सामिप्यराज तिम्सिनाले अवार्ड हस्तान्तरण गरेका थिए। समापन समारोहमा किम्फ अध्यक्षले १५ औं महोत्सव सफल बनाउन प्रत्यक्ष अप्रत्यक्ष रुपमा जोडिएका सम्पूर्णलाई धन्यवाद व्यक्त गरे।