२ बजेसम्म ठोस निर्णय नभए गठबन्धनमा रहँदैनौं : रेशम चौधरी

जेलमुक्त गर्ने लिखित प्रतिबद्धता माग

काठमाडौं  । 

दिउँसो  २ बजेसम्म जेलमुक्त गर्ने लिखित प्रतिबद्धताको माग गर्दै नागरिक उन्मुक्ति पार्टीका संरक्षक रेशम चौधरीले प्रधानमन्त्री तथा माओवादी अध्यक्ष पुष्पकमल दाहाल ‘प्रचण्ड’ र एमाले अध्यक्ष केपी शर्मा ओलीसँग लिखित सम्झौताको माग गरेका छन् ।

उनले दिउँसो २ बजेसम्म यस विषयमा ठोस निर्णय नभए आफू त्यस गठबन्धनमा नरहने समेत जनाएका छन् । चौधरीले डिल्लीबजार कारागारमा सांसद र आफूनिकटका नेताहरूलाई उक्त कुरा बताएका हुन् ।

लिखित प्रतिबद्धता आएमा अहिलेको गठबन्धन कायम रहन्छ नभए गठबन्धन अर्को हुन्छ बैठकमा सहभागी एक नेताले भने । अहिले सुदूरपश्चिम प्रदेशलगायत तीन प्रदेशमा मुख्यमन्त्री चयन हुँदै छन् । सुदूरपश्चिम र लुम्बिनीमा रेशम चौधरीको पार्टी नागरिक उन्मुक्ति पार्टीको उपस्थिति छ । सुदूरपश्चिम सरकार गठनका लागि नागरिक उन्मुक्तिका ७ सांसद निर्णायक छन् ।

अहिलेसम्म नागरिक उन्मुक्ति मौन बसिरहेको छ । यस्तो अवस्थामा कांग्रेस संसदीय दलका नेतालाई प्रदेश प्रमुखले मुख्यमन्त्रीमा नियुक्त गर्ने छन् ।