उत्तर कोरियाले गरयो दक्षिण कोरियासँगको सबै सिमा बन्द

सियोल, २४ असोज । उत्तर कोरियाले दक्षिण कोरियासँगको आफ्नो सीमा पूर्ण रुपमा बन्द गरेको घोषणा गरेको छ । 

 

उत्तरी कोरियाली तानाशाह किम जोङको सेनाले मंगलबार देखी दक्षिण कोरिया जाने सबै सडक र रेलमार्ग बन्द गरिएको बताएका छन् ।

यसका साथै सिमाना छेउछाउका क्षेत्रमा पनि सुदृढीकरण गरिनेछ । उत्तर कोरियाको मिडिया हाउस केसीएनएका अनुसार कोरियाली पिपुल्स आर्मीले दक्षिण कोरिया र अमेरिकाको युद्ध अभ्यासको अवलोकनपछि यो निर्णय गरेको जनाएको हो ।

 

वास्तवमा पछिल्लो एक वर्षमा अमेरिकाले कोरियाली प्रायद्वीपमा आफ्ना विमानवाहक जहाज, सैन्य जहाज, लामो दूरीका बमवर्षक र पनडुब्बी पठाएको छ, जसका कारण उत्तर कोरिया आक्रोशित छ ।

 

दक्षिण कोरियाको रक्षा मन्त्रालयले उक्त क्षेत्रमा कुनै पनि प्रकारको द्वन्द्व नहोस् भनेर अमेरिकी नेतृत्वको संयुक्त राष्ट्रसंघीय कमाण्ड फोर्सलाई यसबारे जानकारी गराएको बताएको छ । यो बलले उत्तर–दक्षिण कोरिया बीचको डिमिलिटराइज्ड जोनको व्यवस्थापन गर्छ।

 

यसअघि दक्षिण कोरियाली सेनाले जनवरीदेखि किम जोङको सेनाले सीमामा ल्यान्ड माइन बिछ्याएको बताएको थियो। यसबाहेक, एन्टी ट्याङ्क जालहरू पनि जडान गरिएको छ र अधिकांश रेल पूर्वाधार हटाइएको जनाईएको छ । गत जुनमा सीमामा सैन्य पूर्वाधार बढाउन काम गरिरहेका धेरै सैनिकहरू बारुदी सुरंग विस्फोटमा मारिए पछि यो घटना पुष्टी भएको हो ।

 

उत्तर कोरियाको यो निर्णयपछि दुई देशबीच तनाव बढ्ने खतरा बढेको छ । उत्तर र दक्षिण कोरियाले यसअघि दोस्रो विश्वयुद्धपछि सन् १९५० देखि ५३ सम्म युद्ध लडेका थिए ।