पार्किङमा रड प्रहार प्रकरणः झापाबाट समातिए निश्चल

काठमाडौं

लाजिम्पाटस्थित एक अस्पतालको पार्किङमा एक व्यवसायी विक्रम लामामाथि अन्धाधुन्ध रड प्रहार गरिएको घटनामा संलग्न रहेको आरोपमा प्रहरीले थप एकजनालई पक्राउ गरेको छ ।

गोरखाका २९ वर्षीय निश्चल सुनुवारलाई झापाबाट पक्राउ गरिएको उपत्यका अपराध अनुसन्धान कार्यालयले जनाएको छ ।

सोही कार्यालयबाट खटिएको प्रहरी टोलीले उनलाई पक्राउ गरेको हो ।

गएको कात्तिक ११ गते लाजिम्पाटस्थित इनोभा अस्पतालको पार्किङमा जग्गा व्यवसायी लामामाथि अन्धाधुन्ध रड प्रहार गरिएको सीसीटीभी फुटेजमा देखिएको थियो ।

रड प्रहारबाट घाइते लामाको उपचार जारी छ । चक्रपथस्थित ग्रीन सिटी अस्पतालमा उनको उपचार भइरहेको प्रहरीले जनाएको छ ।

उक्त घटनामा संलग्न रहेको आरोपमा प्रहरीले यसअघि नुवाकोटकै शैलेन्द्र भनिने मार्सल तामाङलाई पक्राउ गरेको थियो ।

घटनामा संलग्न २ जना अझै फरार छन् । घटनाका मुख्य नाइके अजय लामा र दिपक बरामु अझै फरार रहेको प्रहरीले जनाएको छ ।