दहचोक पर्यटन वर्ष २०८१ सम्पन्न

काठमाडौं । नेकपा एमालेका स्थायी कमिटी सदस्य एव् पूर्व मन्त्री कृष्णगोपाल श्रेष्ठले इन्द्र दह एकीकृत पर्यटन पूर्वाधारको माध्यमबाट चन्द्रागिरिको विकास हुने बताउनु भएको छ । काठमाडौंको चन्द्रागिरि दहचोक–१ मा ८औं ईन्द्रदह पर्यटन उत्सवमा सांसद श्रेष्ठले दहचोक ऐतिहासिक, प्राकृतिक र सास्कृतिक महत्व बोकेको स्थान भएकैले सय गन्तव्य क्षेत्र मध्ये एक भएको उल्लेख गर्नुभयो ।

 

उहाँले विश्वका सबै पर्यटक र नेपालीहरू एक पटक दहचोक आउने वातावरण बनाउन सके चन्द्रागिरिबासीको आर्यआर्जन र जीवनस्तर सोचेको भन्दा माथी उठ्ने दाबी गर्नुभयो । श्रेष्ठले सबैले सोचेको अनुसार यो क्षेत्रलाई अघि बढाउन कुनै दल विशेष नभनी सबैको साथ र सहयोग आवश्यक रहेको बताउनु भयो

 

कार्यक्रममा नेकपा एमालेका नेता तथा बागमती प्रदेशका पूर्वमन्त्री रामेश्वर फुयालले दहचोकको पर्यटन विकासले समग्र राष्ट्रको विकासमा महत्वपूर्ण टेवा पुग्ने उल्लेख गर्नुभयो । उहाँले फागुन ९ गते सधै प्रधानमन्त्री केपी शर्मा ओली आउने कार्यक्रम भए तापनि विशेष कारणले आउन नपाएको जानकारी दिनुभयो । नेता फुँयाले भ्रमण वर्ष १९९८ मा तत्कालीन प्रधानमन्त्री गिरिजाप्रसाद कोईरालाले समुद्घाटन गर्नुभए देखि नै चन्द्रागिरि–१ दहचोकको विकास र समृद्धि आफुसँगै हिडेको बताउनु भयो ।

 

यस्तै बागमती प्रदेशका पूर्वमन्त्री केशव पोखरेलले नेपाल एकीकरणको लागि दहचोकको भूमि पनि उत्तिकै महत्वपूर्ण र ऐतिहासिक गन्तब्य भएको उल्लेख गर्नुभयो । उहाँले यही स्थानमा वीर योद्धा काजी कालु पाण्डेको समाधीस्थल भएकोले पनि दहचोकको यो इतिहास जनमानसमा सधै जिवितै रहने बताउनु भयो ।

 

यसैगरी ईन्द्रदह एकीकृत पर्यटन विकास समितिका अध्यक्ष हरिशरण थापाले दहचोकको समग्र रूपान्तरणका लागि सबै दल एकसाथ हातेमालो गर्दै अघि बढिरहेको बताउनु भयो । उहाँले चन्द्रागिरि नगरपालिकाले दहचोकको महत्व नबुझ्दा दहचोकबासीको आर्थिकोपार्जनको कमजोर बनेको आरोप लगाउनु भयो ।

 

ईन्द्रदह एकीकृत पर्यटन विकास समितिले आयोजना गरेको ईन्द्रदह पर्यटन उत्सवमा चन्द्रागिरि नगरपालिकाका उप–प्रमुख बसन्ती श्रेष्ठ, केही वडाका अध्यक्षहरुलगायतको उपस्थिति रहेको थियो ।