लमजुङमा देव गुरुङले दश हजार मत अन्तरले चुनाव हार्ने आँकलन

काठमाडौँ। लोकतान्त्रिक गठबन्धनको बलियो प्रभाव रहेको लमजुङमा माओवादी केन्द्रका टुरिष्ट उम्मेद्वार देव गुरुङले १० हजार मत अन्तरले चुनाव हार्ने आँकलन गरिएको छ ।

काँग्रेसको बलियो जनाधार रहेको लमजुङमा प्रदेश (क) बाट बामपन्थीभन्दा चार हजार बढी र प्रदेश (ख) बाट ६ हजारभन्दा बढी मत अन्तरले काँग्रेसका दिलबहादुर घर्ती अगाडि रहेको चर्चा चलेको छ । लमजुङको सबैभन्दा बढी मतदाता भएको मध्यनेपाल नपाको स्थानीय उम्मेद्वार भएको कारणपनि घर्तीको राम्रो प्रभाव छ ।

कम्युनिष्टहरुको वाम गठबन्धनको नाममा माओवादी केन्द्रबाट लमजुङ जिल्लामा प्रतिनिधी सभाको उम्मेदवार बनेका देव गुरुङविरुद्ध आफ्नै पार्टीका नेता तथा कार्यकर्ता विद्रोहमा उत्रिएपछि उक्त मतअन्तरले हार्ने निश्चित भएको छ । लमजुङमा एमाले तथा माओवादीका कार्यकर्ताहरुले बाहिरबाट नेता ल्याएर टिकट दिएको भन्दै असन्तुष्टि जनाएका हुन् । गुरुङविरुद्ध माओवादी मात्रै होइन एमालेका नेता तथा कार्यकर्ताहरु पनि देखिएका छन् ।

गुरुङलाई लमजुङका मतदाताहरुले आयातित नेताका रुपमा लिएका छन् ।आफ्नो मनाङ जिल्लाको विकास गर्न नसक्ने गुरुङले कसरी लमजुङको विकास गर्न सक्छन् भनेर प्रश्न गर्न थालेका छन् । मुख्यमन्त्रीको आश्वासन दिएर प्रचण्डले एमालेका पृथ्वीसुब्बा गुरुङलाई प्रदेश सभामा झारेपछि एमालेहरु रुष्ट बनेका हुन् ।

एमाले र माओवादीका नेता तथा सांसदहरुले माओवादीका गुरुङलाई नेता मान्नुपर्ने अवस्था आएको छ । मनाङ जिल्ला घर भएका गुरुङ पदका लागि र एमालेका साथ पाएर सांसद बन्ने लोभका कराण लमजुङ झरेका हुन् । उनका प्रतिस्पर्धी काँग्रेसका दिलबहादुर घर्ती लमजुङ लोकतान्त्रिक आन्दोलनका धरोहर हुन् ।मध्यनेपाल नगरपालिका वडा नं १ का घर्ती लमजुङमात्र नभई नेपालभर लमजुङको नाम चिनाउन सफल नेता हुन् । उनले लमजुङको विकास निर्माणमा राम्रो योगदान गरेको कारण उहाँको बलियो जनाधार रहेको स्थानीयहरु बताउँछन् । तर, उनलाई लमजुङबाट एमाले र माओवादीका नेता तथा कार्यकर्ताहरु नै हराउन सक्रिय भएका छन् । उता ४ नं प्रदेशको मुख्यमन्त्रीको सपना देखेका एमालेका पृथ्वीसुब्बालाई पनि एमालेका नेताहरु नै हराउन सक्रिय भएको स्रोतको भनाइ छ । पृथ्वीसुब्बाले आफ्नो कार्यकालभरि कुनै पनि काम नगरेको मतदाताहरुको भनाई छ ।