आर्थिक समृद्धिकालागि  प्रत्यक्ष निर्वाचित राष्ट्रपतीय प्रणाली

गोरखाः एकिकृत नेकपा माओवादीका वरिष्ठ नेता डा बाबुराम भट्टराईले देशमा स्थिरता कायम गरी आर्थिक समृद्धि प्राप्त गर्न प्रत्यक्ष निर्वाचित कार्यकारी राष्ट्रपतीय प्रणाली आवश्यक रहेको बताउनुभएको छ ।

सहिद भीमसेन स्मृति प्रतिष्ठानले आयोजना गरेको कार्यक्रममा बोल्दै नेता भट्टराईले राष्ट्रिय स्वाधीनता जोगाउँदै देशलाई आर्थिक समुन्नत बनाउन पनि कार्यकारी राष्ट्रपतीय प्रणाली आवश्यक हुने बताउनु भएको हो ।

मुलुकमा स्थिर र बलियो सरकार भयो भने मात्रै भारत र चीनजस्ता ठूला देशलाई सन्तुलनमा राखेर तीव्र आर्थिक विकासतर्फ देशलाई लैजान सकिने भएकाले दलहरूले पुनःसोचेर प्रत्यक्ष निर्वाचित राष्ट्रपतीय प्रणाली अवलम्बन गर्नुपर्ने विचार डा भट्टराईले राख्नुभयो ।

डा भट्टराईले भन्नुभयो, “कांँग्रेस एमालेलाई शङ्का लाग्छ भने बरु म प्रत्यक्ष निर्वाचित राष्ट्रपतिका लागि उम्मेद्वार बन्दिन, तपाईँहरूले रेकर्ड गर्नुहोस्, आज मैले यो घोषणा गरे ।”