भूकम्प पीडितको सुन्दर र बलियो घर बन्छः प्रम कोइराला

काठमाडौँः प्रधानमन्त्री सुशील कोइरालाले सबै भूकम्प पीडितको सुन्दर र बलियो घर बन्न सकोस् भनेर आफू लागिरहेको बताउनु भएको छ । उहाँले सो कुरा बुधबार प्रधानमन्त्री निवास बालुवाटारमा भूकम्प पीडितको सहयोगार्थ प्रधानमन्त्री दैवी प्रकोप उद्धार कोषमा रकम प्रदान गर्न आएका विभिन्न संघ संस्थाका प्रतिनिधिहरुसंग बताउनु भएको हो । “पहाडको कन्दरामा साना झोपडी थिए,” प्रधानमन्त्रीले भन्नुभयो,“ ती पनि भूकम्पले ध्वस्त भए । हरेक पीडित परिवारको एक राम्रो र सस्टेनेबल घर होस् भनेर लागेको छु ।” उहाँले अब बस्ती विकास गर्दा सडक,विद्युत,पानी,ढल,सार्वजनिक उद्यान, स्वास्थ्य केन्द्र, विद्यालय जस्ता भौतिक र सामाजिक सेवाका पूर्वाधारहरु तयार पारिने पनि बताउनु भयो । सो अवसरमा उहाँले कोषमा रहेको रकम राहत,पुनस्थापना,पुनर्निर्माणमा लगाइने बताउदै सबैले पेट काटेर दिएको रकम दुरुपयोग हुन नदिने बताउनु भयो । उहाँले दाताहरुलाई पनि आफूले दिएको रकम दुरुपयोग नहोस भनेर निगरानी गर्न आग्रह गर्नुभयो । उहाँले यति ठूलो विपद्को नेपाली जनताले जसरी मिलेर सामना गरे त्यसको विदेशीहरुले पनि प्रशंसा गरेको बताउनु भयो । सो अवसरमा संविधान निर्माण प्रकृयामा गएकोमा सन्तोष व्यक्त गर्दै प्रधानमन्त्री कोइरालाले नमिलेका कुराहरु समयानुकूल संशोधन हुने बताउनु भयो । प्रधानमन्त्री कोइरालाले संविधान निर्माण भएर जारी भएपछि नेपालमा राजनीतिक स्थिरता कायम हुने बताउदै शान्ति र स्थायित्वको वातावरणमा विकासले गति लिने बताउनुभयो । उहाँले नेपाल लगानीको लागि अनुकूल हुँदै गैरहेको पनि उल्लेख गर्नुभयो । उहाँले विदेशिएका नेपालीहरुले साह्रै दुःख पाएको उल्लेख गर्दै नेपालमा नै रोजगारीको सिर्जना गर्न सकिने बताउनुभयो । उहाँले नेपालमा अब छिट्टै आर्थिक परिवर्तन हुने पनि उल्लेख गर्नुभयो । बुधबार प्रधानमन्त्री निवास बालुवाटारमा आयोजित कार्यक्रममा भूकम्प पीडितहरुको राहत र पुनस्थापनालाई सघाउन वैदेशिक रोजगार व्यवसायी संघले प्रधानमन्त्री दैवी प्रकोप उद्धार कोषमा ८८ लाख ५ सय २९रुपैया ११ पैसा सहयोग प्रदान गरेको छ । सो रकमको चेक संघका अध्यक्ष हंशराज वाग्लेले प्रधानमन्त्री सुशील कोइरालालाई हस्तान्तरण गर्नुभएको थियो । सो अवसरमा श्रमराज्य मन्त्री टेकबहादुर गुरुङ्ग,वैदेशिक रोजगार व्यवसायीहरु नरेश गेलाल,एल.पी.साँवा, प्रेम कटुवाल, किरणकिशोर घिमिरे,भरत खड्का,सरोज पोखरेल, एम.एस काप्री,समशेर बहादुर गुरुङ्ग र डी.बी.मगरको उपस्थिति रहेको थियो । भूकम्प पीडित नेपालीहरुको सहयोगार्थ असम भारतको गुवाहाटीमा रहेका नेपाली दुग्ध व्यवसायीहरुले पनि प्रधानमन्त्री दैवी प्रकोप उद्धार कोषमा रकम प्रदान गरेका छन । बुधबार प्रधानमन्त्री निवास बालुवाटारमा आयोजित कार्यक्रममा नेपाली मन्दिर प्रबन्धक समिति एवं बृहत्तर गुवाहाटी दुग्ध व्यवसायी संस्था गुवाहाटी असमका सभापतिले ७ लाख २१ हजार रुपैयाको चेक प्रधानमन्त्री कोइरालालाई हस्तान्तरण गर्नुभएको थियो । भूकम्प पीडित नेपालीहरुको सहयोगको लागि अमेरिकाको व्योमिङ्गस्थित व्योमिङ्ग विश्वविद्यालयका नेपालका मित्रहरुले प्रधानमन्त्री दैवी प्रकोप उद्धार कोषमा ५ लाख १७ हजार ५ सय १० रुपैया प्रदान गरेका छन ।