‘टोटल धमाल’को धमाका, ‘गल्ली ब्वाइ’ले कमायो सय करोड

  काठमाडौं । बलिउडका लागि यो बर्ष सुखद हुने संकेत देखिएको छ । बिषयवस्तु र कमेडी जनराका चलचित्रले दर्शकको मन जितिरहेका छन् । सुरुवातदेखि नै निकै राम्रो कमाई गरिरहेका छन् । यो बर्षको सुरुवातमै रिलिज भएको चलचित्र ‘उरी’को कमाइले धेरैलाई चकित बनायो । यो चलचित्रले २ सय ४० करोड भन्दा बढी कमाइसकेको छ ।

अहिले अर्को एक चलचित्रले पनि सय करोड क्लबमा आफूलाई उभ्याएको छ । जुन नायिका आलिया भट्ट र नायक रणवीर सिंह अभिनित चलचित्र ‘गल्ली ब्वाइ’हो । रणवीर सिंहले लगातार ३ वटा हिट चलचित्र दिएर आफूलाई दरिलो रुपमा उभ्याएका पनि छन् ।

यसैविच, शुक्रबारदेखि रिलिज भएको कमेडी जनराको चलचित्र ‘टोटल धमाल’ले पनि बक्स अफिसमा धमाका मच्चाएको छ । शुक्रबार १६.५० करोडको कमाई गरेको यो चलचित्रले शनिबार २०.४० करोडको कमाई गरेको छ । दुई दिनमै करिब ३७ करोडको कमाई गरेको चलचित्रले ३ दिनमा ६० करोड माथिको कमाई गर्ने पक्का छ । यस्तै, यो चलचित्रले सय करोड क्लबमा आफूलाई उभ्याउने संभावना पनि देखाएको छ ।