‘लभ स्टेशन’को फस्टलुकमा रोमान्टिक प्रदिप र जसिता

  काठमाडौं । चैत्र २२ गतेदेखि रिलिज हुन लागेको अभिनेता प्रदीप खड्का र अभिनेत्री जसिता गुरुङले दोस्रो पटक सहकार्य गरेको फिल्म ‘लभ स्टेशन’को निर्माण टिमले पोस्टरहरु सार्वजनिक गरेको छ । सार्वजनिक पाँच पोस्टरमा जसिताप्रति प्रदीपको प्रेम भाव देखाइएको छ । दुबैलाई रोमान्टिक मुडमा देख्न सकिन्छ । पाँचमध्ये दुई पोस्टरमा भने प्रदीप र जसिता सोलो फिचर्ड छन् । एकमा प्रदीपको हातमा गितार देख्न सकिन्छ । भने, दोस्रोमा जसिता लिंगे पिंगमा रमाइरहेकी छन् । 

फिल्मलाई भेट्रान निर्देशक उज्जवल घिमिरेले निर्देशन गरेका हुन् । प्रदीप र जसिताका अलावा फिल्ममा रमेश बुढाथोकी, सरु बिष्ट, रवि डंगोल, प्रकाश शाह, प्रिया रिजाल, रेशु भट्टराई, कालु राना, विनोदकुमार पौड्याल, दिनेश काफ्ले लगायतका कलाकारको पनि अभिनय छ ।

निर्देशक घिमिरेका अनुसार, ‘लभ स्टेशन’ सांगीतिक प्रेम कथामा आधारित पारिवारिक फिल्ममा हो । यो फिल्मलाई काफिया फिल्मस्को ब्यानरमा काफिया शाही (क्रिसु) र कविरविक्रम शाहीले निर्माण गरेका हुन् । आलोक शुक्लाको छायांकन रहेको यसमा शम्भुजीत बाँस्कोटा, दीपक शर्मा, राजनराज शिवाकोटी र एलिश कार्कीको संगीत छ ।