खेलमा सट्टावाजी गर्ने तीन जना पक्राउ

   काठमाडौं । महानगरीय अपराध महाशाखाले खेलमा सट्टेबाजी गर्दै आएका तीन जनालाई पक्राउ गरेको छ । इङ्ल्याण्डमा जारी विश्वकप क्रिकेट, केही समय अघि सम्पन्न इन्डियन प्रिमियर लिग (आईपीएल) र फुटबललगायतका विभिन्न सट्टेबाजीको धन्दा चलाउँदै आएका तीन जनालाई पक्राउ गरिएको महाशाखा प्रमुख एसएसपी सहकुलबहादुर थापाले बताए ।

बिभिन्न ब्यक्तिहरुलाई हारजितको वाजी राख्न लगाई सट्टावाजी गरी अबैध रुपमा रकम असुली गरीरहेको सूचनाका आधारमा महाशाखाले मंगलबार तीन जनालाई पक्राउ गरेको हो ।

पक्राउ पर्नेमा सिन्धुपाल्चोक जुगल गाउँपालिका–२ गोल्चे घर भई हाल स्वयम्भु बस्ने बज्र प्रकाश लामा र बिद्युत प्रकाश लामा तथा रामेछाप लिखु गाउँपालिका–२ सैपु घर भई हाल रानीवन बस्ने उमेश कार्की छन् ।

प्रहरीले बिजेश्वरी र न्यूरोडबाट पक्राउ परेका लामाद्धय र कार्कीबाट एक लाख रुपैयाँ बरामद गरेको छ । महाशाखाले पक्राउ परेका तीनै जनालाई आज आवश्यक अनुसन्धान तथा कारवाहीको लागि महानगरीय प्रहरी परिसर काठमाडौंमा पठाईएको छ ।