भक्तपुरकै ठूलो राशीको ‘हाफकोर्ट’ बास्केटवल प्रतियोगिता कार्तिक १० गते हुने

भक्तपुर । 
यही कार्तिक १० गते भक्तपुरकै ठूलो राशीको ‘हाफकोर्ट’ बास्केटवल प्रतियोगिता हुने भएको छ । प्रतियोगिताको सबै तयारी पूरा भएसँगै प्रतियोगितामा भक्तपुर र काभ्रे जिल्लाका प्रतियोगिहरुले सहभागिता जनाउन पाउने आयोजक विकास संरक्षण तथा प्रवद्र्धन समिति गुण्डूले जानकारी दिएको छ ।
 
प्रतियोगिताको विजेतालाई ५० हजार, उपविजेतालाई २० हजार र उत्कृष्ट खेलाडीलाई पाँच हजार पुरस्कार रहेको समितिका संयोजक दिनेश थापाले जानकारी दिए । शनिबार विहान ७ बजे हुने प्रतियोगिता शुरु हुने उनले बताए । दशैंअगाडी नै गर्ने भनिएता पनि बाढीपहिरो तथा अन्य प्राकृतिक विपत्तीका कारण देशनै शोकमा परेकाले उक्त कार्यक्रम स्थगित गरिएको थियो । 

प्रतियोगिताका साथै नेपालीहरुको महान् पर्व दिपावली, नेपाल सम्वत्, छठलगायतका पर्वहरुको शुभकामना आदानप्रदान सहित नेकपा (एमाले)को पोलिटव्युरो सदस्य तथा पूर्वमन्त्री महेश बस्नेत र सुर्यबिनायक नगरपालिकाका नगर प्रमुख बासुदेव  थापाले संयुक्त रुपमा पार्किङ सहितको सुविधा सम्पन्न उक्त प्रतियोगिता हुने खेलमैदान उद्घाटन गरिने भएको छ ।

समापन कार्यक्रमको प्रमुख अतिथि बागमती प्रदेशका स्वास्थ्यमन्त्री किरण थापा तथा विशेष अतिथि जिल्ला समन्वय प्रमुख इश्वर बहादुर थापा रहनुहुने संयोजक थापाले बताए । त्यस्तै कार्यक्रमको प्रत्यक्ष प्रशारण नमस्ने ख्वप टेलिभिजनले गर्ने भएको छ ।

हाल एमाले भक्तपुरको इन्चार्ज समेत रहनुभएका नेता बस्नेत भक्तपुर क्षेत्र नं। २ बाट प्रतिनिधिसभाको सांसद भएको समयमा ‘सांसद विकास कोष र नगरपालिकाको सहकार्य’मा रु ४० लाखको लागतमा निर्माण गरिएको सुन्दर तथा मनोरम प्राकृतिक वातावरणसहितको उक्त बास्केटवल खेलमैदान हाल व्यवस्थापकीय कार्य सम्पन्न गरी उद्घाटन गर्न लागिएको हो ।

उक्त स्थानमा नेता बस्नेतको ड्रिम प्रोजेक्टको रुपमा फुटशल मैदान, पार्क, पर्यटन प्रवद्र्धनात्मक कार्य तथा अन्य विभिन्न कार्यहरु समेत निर्माण सम्पन्न भइसकेका छन् ।